Wednesday , October 18 2017
Home / شہر کی خبریں / آندھرا پردیش میں بھی کے سی آر کی مقبولیت

آندھرا پردیش میں بھی کے سی آر کی مقبولیت

پوسٹرس اور فلیکسی پر چندرا بابو نائیڈو کے ساتھ چیف منسٹر تلنگانہ کی تصویر آویزاں
حیدرآباد ۔ 4۔ اکتوبر (سیاست نیوز) چیف منسٹر کے چندر شیکھر راؤ کی مقبولیت تلنگانہ کے علاوہ آندھراپردیش میں بھی دکھائی دے رہی ہے ۔ آندھراپردیش سے تعلق رکھنے والے تلگو دیشم قائدین نے اپنے پوسٹرس پر چندرا بابو نائیڈو کے ساتھ کے سی آر کی تصویر آویزاں کی ہے۔ کے سی آر کی یہ مقبولیت تلگو دیشم پارٹی میں موضوع بحث بن چکی ہے۔ پارٹی کی توسیع کیلئے گزشتہ دنوں ’’گھر گھر تلگو دیشم‘‘ پروگرام کا آغاز کیا گیا تاکہ عوام کو زیادہ سے زیادہ پارٹی سے قریب لایا جائے۔ پرکاشم ضلع کے بیلی کروا منڈل میں مقامی تلگو دیشم قائدین نے اس اسکیم کا ایک بڑا پوسٹر اور فلیکسی آویزاں کی ہے جس پر این ٹی آر اور چندرا بابو نائیڈو کے علاوہ کے سی آر کی تصویر کو شامل کیا گیا۔ مقامی رکن اسمبلی جی روی کمار کے استقبال کیلئے مقامی سرپنچ پروین کمار نے یہ فلیکسی لگائی ہے۔ بتایا جاتا ہے کہ حالیہ عرصہ میں کے سی آر کے دو مرتبہ دورہ آندھراپردیش سے متاثر ہوکر تلگو دیشم قائدین نے ان کی تصویر شامل کرنے کا فیصلہ کیا ہے ۔ گزشتہ دنوں کے سی آر نے اننت پور پہنچ کر تلگو دیشم قائد پی سنیتا کے فرزند کی تقریب شادی میں شرکت کی تھی۔ اس موقع پر موجود سینکڑوں کی تعداد میں عوام نے کے سی آر کا والہانہ استقبال کیا تھا۔ کے سی آر کے اننت پور میں مختصر توقف کے دوران جگہ جگہ عوام کی جانب سے استقبال ان کی مقبولیت کا واضح ثبوت ہے۔ تلنگانہ کے ساتھ ساتھ آندھراپردیش میں بھی کے سی آر کی مقبولیت پر ٹی آر ایس حلقوں میں مسرت کا اظہار کیا جارہا ہے ۔ آندھراپردیش کے مختلف علاقوں میں کے سی آر کی سالگرہ تقاریب منائی گئی تھی اور ان کے حامیوں نے کیک کاٹ کر خوشی کا اظہار کیا تھا ۔ کے سی آر کے دورہ تروپتی کے موقع پر بھی آندھرا میں موجود ان کے حامیوں نے استقبال کیا تھا ۔ ٹی آر ایس حلقوں کا کہنا ہے کہ کے سی آر نے عوام کی بھلائی کیلئے جن اسکیمات کا آغاز کیا ہے، اس کے سبب وہ آندھرا کے عوام کے دلوں میں جگہ بنا چکے ہیں۔ کے سی آر دونوں تلگو ریاستوں کی بیک وقت ترقی کے خواہاں ہیں۔

TOPPOPULARRECENT