Wednesday , August 23 2017
Home / Top Stories / استنبول کو فتح کرنے میں ہمارا ساتھ دیں

استنبول کو فتح کرنے میں ہمارا ساتھ دیں

رجب طیب اردغان کے خلاف سخت تبصرہ، داعش کا ویڈیو

استنبول ۔ 18 ۔ اگست (سیاست ڈاٹ کام) آئی ایس آئی ایل (داعش) سے تعلق رکھنے والے ترک دہشت گرد نے صدر رجب طیب اردغان پر شدید نکتہ چینی کرتے ہوئے استنبول پر چڑھائی کرنے کا اعلان کیا۔ اسلامک اسٹیٹ کے جاری کردہ ویڈیو میں ترکی عوام پر زور دیا گیا کہ وہ رجب طیب اردغان کے خلاف اٹھ کھڑے ہوں۔ ان پر غداری کا الزام عائد کیا گیا جنہوں نے امریکہ اور کرد دہشت گردوں کی مدد حاصل کی۔ یہ ویڈیو شمالی شام کے آئی ایس زیر کنٹرول صوبہ رقہ میں ریکارڈ کیا گیا ہے اور یہ ترکی کے خلاف انتہا پسندوں کی واضح دھمکی پر مبنی ہے۔ ترکی پر طویل عرصہ سے آئی ایس جنگجوؤں کے خلاف موثر لڑائی شروع نہ کرنے کا الزام عائد کیا جارہا تھا۔ یہاں تک کہ بعض گوشوں نے اس گروپ سے اشتراک کے بھی الزامات عائد کئے تھے حالانکہ ترکی نے اس کی سختی سے تردید کی تھی ۔

تاہم گزشتہ ماہ ترکی نے پہلی مرتبہ جہادیوں کے خلاف فضائی حملے شروع کئے ۔ اس کے علاوہ داعش کے ٹھکانوں پر خطرناک و مہلک حملوں کے لئے اپنے کلیدی فوجی اڈے امریکی فورس کیلئے کھول دیئے ۔ ترکی نے گزشتہ ماہ شام کی سرحد کے قریب کرد ٹاؤن سروک میں ہوئے بم دھماکہ کے بعد یہ کارروائی شروع کی جس میں 33 افراد ہلاک ہوگئے تھے۔ ترکی نے اس حملہ کیلئے اسلامک اسٹیٹ گروپ کو مورد الزام قرار دیا ہے ۔ آج داعش کا یو ٹیوب پر جو ویڈیو پیش کیا گیا ، اس کا عنوان ’’ترکی کیلئے پیام‘‘ ہے۔ جس میں ایک باریش شخص نے ترک زبان میں صدر رجب طیب اردغان کے خلاف سخت ریمارکس کئے ہیں۔ اس نے کہا کہ رجب طیب اردغان ’’مشرک‘‘ ہیں جنہوں نے امریکہ کو اپنا دوست بنایا ہے ۔ اسی طرح علحدگی پسند بے دین جماعت اور سخت سیکولر کردستان ورکرس پارٹی (پی کے کے) کو اپنا ہمنوا بنایا ہے۔ اس شخص نے کہا کہ ترکی کا مغربی حصہ بہت جلد ’’صلیبیوں ‘‘ کے قبضہ میں ہوگا۔ یہ اشارہ امریکہ کی طرف ہے اور ملک کے مشرقی حصہ اناطولیہ پر پی کے کے کاکنٹرول ہوگا۔

اس شخص نے ترک عوام پر زور دیا کہ وہ خود ساختہ داعش کے خلیفہ ابوبکر البغدادی سے وفاداری کا مظاہرہ کریں تاکہ جہادیوں کو استنبول پر فتح حاصل کرنے میں مدد ہوسکے۔ اس شخص نے ترک عوام پر بے دین افراد کے خلاف لڑائی میں اپنا وقت ضائع کئے بغیر جلد شامل ہوجانے پر زور دیا جنہوں نے انہیں (عوام) کو اس صلیبیوں کا غلام بناکر رکھا۔ سوشیل میڈیا پر یہ ویڈیو 17 اگست کو جاری کی گئی۔ ویڈیو میں کہا گیا ہے کہ رجب طیب اردغان اسلامی قوانین کو نہیں اپناتے ۔ انہوں نے امریکہ ، یہودی ، صلیبیوں اور ملحد پی کے کے ارکان ، اتاترک کے صلیبی دوستوں اور ایف ایس اے کے علاوہ سعودی خاندان کے جاسوسوں کو اپنا ہمنوا بنا رکھا ہے۔ اس شخص نے کہا کہ ہم سب کو مل کر اللہ کی رسی کو مضبوطی سے تھامنا ہوگا اور اس کیلئے امیر ابوبکر البغدادی کا ساتھ دیں۔ ہم سب مل کر اسنتبول کو فتح کریں گے جسے غدار اردغان نے صلیبیوں کے حوالہ کرنے کیلئے کوئی کسر باقی نہیں رکھی۔ واضح رہے کہ ترکی میں گزشتہ ماہ سے جھڑپیں جاری ہیں اور سیکوریٹی فورسس و پی کے کے دہشت گردوں کی ہلاکت واقع ہوئی ہے ۔ ترکی نے داعش کے خلاف بڑے پیمانہ پر کارروائی شروع کر رکھی ہے۔

TOPPOPULARRECENT