Sunday , September 24 2017
Home / شہر کی خبریں / تلنگانہ اور آندھراپردیش میں وقفہ وقفہ سے بارش

تلنگانہ اور آندھراپردیش میں وقفہ وقفہ سے بارش

کئی دیہاتوں کا رابطہ سڑک سے ٹوٹ گیا
حیدرآباد،15ستمبر(یواین آئی)تلنگانہ اور آندھراپردیش میں گزشتہ تین دنوں سے وقفہ وقفہ سے بارش کا سلسلہ جاری ہے ۔ جس سے عام زندگی مفلوج ہوگئی ہے ۔ بارش کے سبب کئی ذخائر آب کی سطح میں اضافہ ہوا ۔ کئی دیہاتوں کا رابطہ سڑک سے ٹوٹ گیا ۔کمشنر گریٹر حیدرآباد میونسپل کارپوریشن جناردھن ریڈی نے کارپوریشن کے اعلی حکام کو ہدایت دی ہے کہ وہ چوکس رہیں ۔ انہوں نے نشیبی علاقوں میں رہنے والوں کو چوکس رہنے کی بھی ہدایت دی ۔ ساتھ ہی پرانی ‘ خستہ حال عمارتوں میں رہنے والوں کا تخلیہ کروانے کی بھی ہدایت دی تاکہ نقصانات کو روکا جاسکے ۔ انہوں نے عمارتوں سے متصل جھونپڑیوں میں رہنے والوں کا فوری تخلیہ کرانے کی بھی ہدایت دی ۔ تاکہ کسی بھی ناگہانی واقعہ یا دیوار گرنے کے واقعات کو روکا جاسکے ۔بارش کے سبب بعض نشیبی علاقوں میں پانی داخل ہوگیا ۔ شدید بارش سے حیدرآباد ‘ بیدر انٹر سٹی ایکسپریس ٹرین کی پٹریوں کو نقصان پہونچا ۔ وقارآباد تا پرگی چلائی جانے والی ٹرین کی پٹریوں کو بھی نقصان پہونچا جس سے کئی ٹرینوں کی آمد و رفت متاثر رہی ۔ اسی دوران محکمہ موسمیات نے امکان ظاہر کیا ہے کہ آئندہ پانچ دنوں تک دونوں تلگو ریاستوں میں وقفہ وقفہ سے بارش ہوگی ۔ شدید بارش کے سبب ضلع رنگاریڈی کے وقارآباد میں ٹرین کی پٹریاں بہہ گئیں جس سے وقارآباد ۔حیدرآباد کے درمیان ٹرینوں کی آمد و رفت متاثر رہی ۔ بعض ٹرینوں کو منسوخ کردیا گیا اور بعض کے رخ کو تبدیل کردیا گیا ۔ ریلوے کے حکام نے بارش کے سبب چوکسی اختیار کی اور نئی پٹریاں بچھانے کا کام شروع کردیا گیا ۔ ضلع میدک میں شدید بارش سے زرعی اراضیات کو شدید نقصان پہونچا ۔

TOPPOPULARRECENT