Wednesday , September 20 2017
Home / شہر کی خبریں / خواتین کو قلم کی طاقت سے اپنے وجود کا احساس دلانے کا مشورہ

خواتین کو قلم کی طاقت سے اپنے وجود کا احساس دلانے کا مشورہ

محفل خواتین کے ماہانہ اجلاس سے محترمہ قمر جمالی اور ڈاکٹر فاطمہ شہناز کا خطاب
حیدرآباد ۔ 12 ۔ اپریل : ( راست ) : خواتین اپنی پوشیدہ صلاحیتوں کو باہر لائیں اور قلم کو ایک طاقتور ہتھیار بنائیں تاکہ وقت پڑنے پر اس سے تلوار کا کام لے سکیں ۔ ان خیالات کا اظہار صدر جلسہ محترمہ قمر جمالی نے کیا جو محفل خواتین کے ماہانہ اجلاس کو مخاطب کررہی تھیں ۔ یہ اجلاس 8 اپریل کو حمایت نگر میں منعقد ہوا ۔ مہمان خصوصی محترمہ طاہرہ کمال تھیں ۔ ادبی اجلاس میں محترمہ نسیمہ تراب الحسن نے جناب آغا حیدر حسن کے فن و شخصیت پر روشنی ڈالی ۔ ڈاکٹر فاطمہ شہناز جو جناب آغا حیدر حسن کی نواسی ہیں آغا کی زندگی کے مختلف گوشوں سے واقف کرایا ۔ انہوں نے کہا کہ وہ غیر معمولی شخصیت کے مالک تھے ۔ دلی کی زبان میں کئی کتابیں تحریر کیں جن میں نسوانی رنگ جھلکتا ہے ۔ اس موقعہ پر محترمہ تنویر الطاف علی کی تصنیف ’ گلدستہ حیات ‘ کی رسم اجراء پروفیسر حبیب ضیا نے انجام دی ۔ محترمہ تسنیم جوہر نے تنویر الطاف کا تعارف کرایا ۔ محترمہ ثریا جبین نے تنویر کے فن کا جائزہ لیتے ہوئے ان کے مضامین کا مکمل احاطہ کیا ۔ محترمہ درخشاں انصاری نے بھی مخاطب کیا ۔ محترمہ مظفر النساء ناز نے محفل کی جانب سے تنویر کو تہنیت پیش کی ۔ بزم علم و ادب شعبہ خواتین کی جانب سے جوائنٹ سکریٹری رفیعہ نوشین نے مبارکباد دی ۔ محترمہ عطیہ نور الحق ، شبینہ فرشوری ، نکہت آرا شاہین نے شال پوشی کی ۔ محترمہ عزیزہ محبوب نے تہنیتی قطعات فریم کی شکل میں پیش کئے ۔ آخر میں محترمہ تنویر الطاف نے تمام مہمانوں اور سامعین کا شکریہ ادا کیا ۔ اس موقعہ پر نواب میر اکبر علی خاں سابق گورنر اڑیسہ کی دختر محترمہ فیض النساء ایڈوکیٹ کے علاوہ دانشوران و طالبات اور ادب دوست خواتین کی کثیر تعداد نے شرکت کی ۔۔

TOPPOPULARRECENT