Thursday , October 19 2017
Home / مذہبی صفحہ / دنیا اہل اسلام کیلئے آزمائش کا مقام ہے

دنیا اہل اسلام کیلئے آزمائش کا مقام ہے

ابوزہیرسید زبیر ہاشمی نظامی معلم جامعہ نظامیہ

یہ مبارک مہینہ شوال المکرم کا ہے جس کے لمحات ہمارے لئے ایک غنیمت ہیں۔ اﷲ تبارک و تعالیٰ کا بڑا احسان ہے کہ اس نے ہم سب کو ماہِ رمضان المبارک عطافرما یا تھا ۔ اب ہم میں سے خوش نصیب ہے وہ شخص جس نے گزشتہ متبرک مہینہ کی قدر کیا ہے، پھر اﷲ تبارک و تعالیٰ نے ہمیں عید الفطر کے موقع پر خوشی منانے کا بھی بھرپور موقع عنایت فرمایا ہے۔ یقینا اس نعمت عظمیٰ پر جتنا شکر بجالائیں، کم ہے، کیونکہ ایسی نعمت ہر ایک کو بار بار حاصل نہیں ہوتی ، جیسے ہی عید الفطر کی خوشی مکمل ہوئی تو ہمارے بعض بھائی یہ سمجھتے ہیں کہ اب ہمیں کوئی عبادت نہیں کرنی ہے ، کیونکہ ہم نے ماہ رمضان المبارک میں عبادتوں، ریاضتوں، مجاہدات اور ثواب حاصل کرنے والی اشیاء کو اختیار کیا ہے۔اب اس کی ضرورت نہیں ہے؟ یہ سوچ بالکل غلط ہے ۔یاد رکھئے ! جب تک ہمیں اس دنیا میں زندگی گزارنے کا موقع ملتارہے گا تب تک ہم بندوںپراﷲتعالیٰ کی عبادت اور حضور اکرم صلی اللہ علیہ وسلم کی اطاعت واجب ولازم ہے۔ اس کے بغیر کوئی چارہ نہیں ہے۔
اب ماہِ شوال المکرم شروع ہوچکا ہے، جس کی آج ۹ تاریخ ہے۔ اس مبارک مہینے کے تعلق سے حدیث پاک میں ہے کہ حـضورنبی اکرم صلی اللہ علیہ وسلم نے ارشاد فرمایا کہ ’’جس کسی نے ماہِ رمضان المبارک کے روزوں کے ساتھ ساتھ اگر ماہِ شوال المکرم میں چھ روزے رکھے، چاہے وہ تسلسل کے ساتھ ہو یا بغیر تسلسل کے، تو وہ شخص ایساہے کہ اس نے تمام زمانے کے روزے رکھا‘‘۔ سبحان اﷲ۔ تو پتہ چلاکہ روزوں کی کتنی عظمت و فضیلت ہے ، ہم تمام مسلمانانِ عالم پر یہ ذمہ داری ہے کہ اس طرح کی چیزوں کو اختیار کرنے کے لئے پیش پیش رہیںتاکہ اﷲتعالیٰ ہمیں اپنے مقبول بندوں کی فہرست میں شامل فرمالے۔
دنیا کا طلبگار ’’ کلب ‘‘کی طرح : جیسا کہ ہمارے ذہن میں یہ بات داخل ہوچکی ہے کہ ہمیں دنیا کی ہر چیز حاصل ہوجائے، عیش و عشرت، نفسانی خواہشات وغیرہ۔
تو یاد رکھ لیجئے کہ صرف دنیا کو حاصل کرنا ایک مسلمان کی عادت نہیں ہے، بلکہ یہ عادت کسی اور مذہب کے ماننے والے کی ہوتی ہے۔جیسا ایک حدیث پاک میں حضورنبی اکرم علیہ الصلوۃ والسلام نے دنیا اور دنیا دار کی مثال دیتے ہوئے ارشاد فرمایاہے کہ ’’الدنیا جیفۃ وطالبھا کلاب‘‘ ترجمہ : دنیا ایک حقیر یعنی معمولی چیز ہے اور اس دنیا کا طلب کرنے والا ایک کلب (یعنی کتے) کی طرح ہے ۔ اور یہ بات بالکل عیاں ہے کہ جتنے لوگ صرف دنیا کو طلب کرنے میں لگے رہتے ہیں وہ یقینا ایک حریص یعنی لالچی ہوتے ہیں۔ اور اس کیلئے کچھ بھی کرنے تیارہوجاتے ہیں۔ جبکہ ہمیں ایسا نہیں ہونا چاہئے۔
ہماری یہ عادت ہونی چاہئے کہ دنیوی زندگی کو ہی سب کچھ نہ سمجھ بیٹھیں، بلکہ یہ دنیا ہم مسلمانوں کیلئے ایک امتحان کامقام ہے جس طریقہ سے ہم جب کبھی کوئی امتحان دینے کا ارادہ رکھتے ہیں تو پہلے امتحان کی تیاری کرتے ہیں اس کے بعد امتحان دینے کے لئے مستعد رہتے ہیں۔ ٹھیک اسی طرح ہمیں اس دنیا میں آخرت کی تیاری کرنا چاہئے تاکہ وہاں کامیابی وسرفرازی حاصل ہوجائے ۔
معاشرہ اور ہماری کوتاہیاں:ہمارامسلم معاشرہ (سوسائٹی) جو دیگر تمام معاشروں میں بہتر اور ممتاز ہے لیکن ہم میں سے کچھ لوگوں نے کوتاہیوں کے ذریعہ اس معاشرہ کوبدنام کرناشروع کیا ہے۔ نہ انہیں شریعت کا لحاظ، نہ لباس کا ، نہ ظاہرکا، نہ باطن کا،نہ سماعت درست ، نہ بصارت ،نہ گویائی ، نہ کسی کا ادب ، نہ کسی کا خیال، بس کسی سے کچھ بات کریں تو غیبت ، چغلخوری ، فسق وفجور، فحش باتیں، فحش مناظر، فحش مطالعات، بُری صحبت ، شریعت کی منع کردہ بُری اشیاء کا استعمال کرنا، ہرکسی کو تکلیف دینا، نامناسب مقامات کا دورہ کرنا۔ یہ سب ایسی چیزیں ہیں جس کے ذریعہ نہ صرف اس کواختیار کرنے والا انسان بُر ا ہوتا ہے بلکہ اس کے ساتھ ساتھ معاشرہ بھی بدنام ہوتاہے ۔ جس سے  ہرمسلمان کو بچنا بے انتہاء ضروری ہے ۔
مقصدِ زندگی اور ضرورتِ زندگی :اگر ہم ہماری زندگی کاجائزہ لیں تو پتہ چلے گا کہ ہماری زندگی کیسے گزر رہی ہے ، جب کہ ہمیں کیسے گزارنا چاہئے تھا۔چنانچہ بتلایا گیا ہے کہ زندگی گزارنے کے دو طریقے ہیں  (۱)  مقصدِ زندگی (۲)  ضرورتِ زندگی ۔ یہ دونوں چیزیں قابل غور ہیں، تاکہ ہمیں بہتر طور پر زندگی گزارنے کا موقع ملے۔
مقصدِ زندگی: دین کا علم حاصل کرنا۔
ضرورتِ زندگی : دنیا کا علم حاصل کرنا۔
مقصدِ زندگی کو اس لئے اختیارکرنا ہے کہ ہمیں اس سے دارین میں کامیابی نصیب ہوجائے ۔اور ضرورتِ زندگی کواسلئے ہمیں اختیار کرنا چاہئے تاکہ اس کو دنیامیں روزی روٹی کے لئے ذریعہ بنایاجائے۔
لیکن آج ہمارا مسلم نوجوان صرف اور صرف ضرورتِ زندگی کے پیچھے پڑا ہے اور اسی کو سب کچھ سمجھ بیٹھاہے، جو کہ سراسر غلطی ہے۔ اور مقصدِ زندگی یعنی علم دین کو اختیار کرنامثلا حافظِ قرآن بننا ، عالمِ دین با عمل بننا ، تو اس سے آمدنی کیا حاصل ہوگی ؟ اور اس سے ہمارا گذرا کیسے ہوگا؟ تویہ سمجھنا بالکل غلط نظریہ اور غلط عمل ہے۔ یہ ایک سمجھدار انسان کی علامت ہرگزنہیں ہوسکتی۔
تمام والدین اور سرپرستوں سے خواہش ہے کہ اپنے بچوں کو دین و دنیا دونوں سے روشناس کروانے اور صحیح العقیدہ بنانے کیلئے دینی جامعات و  مدارس میں داخلہ دلوائیں، تاکہ ان بچوں کا مستقبل بہتر بن سکے۔ اور اِس وقت جو گمراہی و بدعقیدگی کا بازار گرم ہے، اس سے دور  رہ سکیں۔
اﷲتعالی ہم سب کو نیک توفیق عطافرمائے ۔ اٰمین
[email protected]

TOPPOPULARRECENT