Thursday , September 21 2017
Home / Top Stories / لڑکی کو جنم دینے پر ساس نے بہو کو کار کا تحفہ دیا

لڑکی کو جنم دینے پر ساس نے بہو کو کار کا تحفہ دیا

بیٹوں سے زیادہ بیٹیاں ہی بہتر ، موظف انسپکٹر ہیلت ڈپارٹمنٹ کا تاثر
ہمیرپور ( یو پی ) ۔ 5 ۔ نومبر : ( سیاست ڈاٹ کام ) : لڑکی کو جنم دینے پر بہو کو باہر کا راستہ دکھانے کے بجائے ساس نے فرط مسرت سے بہو کو نئی ہونڈا سٹی کار تحفہ میں دی ۔ اترپردیش کے ہمیرپور ضلع میں ایک ساس کے اس حیرت انگیز اقدام کی زبردست ستائش کی جارہی ہے ۔ جب ساس کو علم ہوا کہ ان کی بہو نے لڑکی کو جنم دیا ہے تو وہ اپنے جذبات کو قابو میں نہیں کرسکیں ۔ ایک ایسے سماج میں جہاں لڑکیوں کی پیدائش پر طعنے اور تشنے دئیے جاتے ہیں اور بہو کو گھر کے باہر بھی کردیا جاتا ہے ۔ اس ساس نے اپنی بہو کو کار تحفہ میں دے کر ایک تاریخ رقم کی ہے ۔ محکمہ ہیلت کی موظف انسپکٹر پریما دیوی کا خیال ہے کہ ان کی بہو نے لڑکی کو جنم دے کر اچھا کام کیا ہے ۔ کیوں کہ میرا خیال ہے کہ بیٹیاں ، بیٹوں سے زیادہ بہتر ہوتی ہیں ۔ پریما دیوی کے فرزند ضلع ہمیرپور میں ایک سرکاری عہدیدار ہیں ۔ ان کی بہو خوشبو گرہست خاتون ہیں ۔ خوشبو کے بطن سے لڑکی تولد ہوئی تو پریما دیوی نے اپنی پوتری کی پیدائش کا جشن منانے کے لیے مختصر پارٹی کا اہتمام کیا ۔ ہونڈا سٹی کار کو بطور تحفہ بھی دیا ۔ پریما دیوی نے کہا کہ ان کے گھر پوتری کی آمد دیوالی کا تحفہ ہے ۔ اس لیے انہوں نے اپنی بہو کو بھی برانڈ نیو ہونڈا سٹی کار کا تحفہ دیا ہے ۔ اپنی ساس کے جذبہ کو دیکھ کر بہو خوشبو کے چہرہ پر خوشیاں دیکھی گئیں اور فرط مسرت سے آنسو بھی نکل آئے ۔ پریما دیوی نے کہا کہ لڑکیوں کو پیدا ہونے سے قبل ہی مادر رحم میں مار دینا گناہ ہے ۔ اس عمل کو روکنا ضروری ہے ۔ جب بہو کو بیٹیوں کا درجہ دیا جائے تو سب مسائل ختم ہوں گے ۔ بہر حال وہ بھی تو کسی کی بیٹیاں ہوتی ہیں ۔ جیسا بیٹیوں سے محبت کی جاتی ہے اگر بہوؤں کو بھی اتنا ہی پیار دیا جائے تو ہر گھر میں خوشیاں ہوں گی ۔

TOPPOPULARRECENT