Wednesday , August 23 2017
Home / شہر کی خبریں / میڈیکل ہب کا حیدرآباد شہر بیمار ہب میں تبدیل

میڈیکل ہب کا حیدرآباد شہر بیمار ہب میں تبدیل

ٹی آر ایس حکومت پر معمولی رقم کے لیے سستی شراب عام کرنے کا الزام ، ڈی کے ارونا
حیدرآباد ۔ 24 ۔ اگست : ( سیاست نیوز) : کانگریس کی رکن اسمبلی و سابق وزیر مسز ڈی کے ارونا نے میڈیکل ہب کا درجہ رکھنے والے حیدرآباد کو بیمار ہب میں تبدیل کردینے کا ٹی آر ایس حکومت پر الزام عائد کیا ۔ آج یہاں ایک پریس کانفرنس سے خطاب کرتے ہوئے مسز ڈی کے ارونا نے کہا کہ صرف 5 ہزار کروڑ روپئے کی آمدنی کے واسطے سستی شراب کو عام کیا جارہا ہے ۔ کانگریس کے 10 سالہ دور حکومت میں چیف منسٹرس کی دور اندیشی کی وجہ سے شہر حیدرآباد و اس کے اطراف و اکناف سرکاری و کارپوریٹ ہاسپٹلس کا جال بچھا دیا گیا ۔ راجیو آروگیہ شری اسکیم کے ذریعہ غریب عوام کا بھی کارپوریٹ ہاسپٹلس میں علاج کرانے کی سہولت فراہم کی گئی ۔ ٹی آرا یس حکومت سستی شراب کو عام کرتے ہوئے صحت مند شہر حیدرآباد کو بیمار شہر میں تبدیل کررہے ہیں ۔ جس کی کانگریس پارٹی سخت مذمت کرتی ہے ۔ چیف منسٹر تلنگانہ مسٹر کے چندر شیکھر راؤ نے عوام کی صحت کو نظر انداز کر کے سرکاری خزانے کو بھرنے کے لیے نئی اکسائز پالیسی کا اعلان کیا ہے ۔ جس کی سارے تلنگانہ میں مخالفت ہورہی ہے ۔ جمہوریت میں عوام ہی بادشاہ ہوتے ہیں اور عوام کا فیصلہ قطعی ہوتا ہے ۔ تلنگانہ کے عوام نے صرف 5 سال کے لیے ٹی آر ایس کو اقتدار سونپا ہے ۔ عوامی فلاح و بہبود اور ترقی کے لیے کام کرنے کے بجائے چیف منسٹر مخالف عوام پالیسیوں پر عمل کررہے ہیں ۔ گڑمبا کو کنٹرول کرنے میں ناکام ہونے والی ٹی آر ایس حکومت سستی شراب کو عام کررہی ہے ۔ نلوں کے ذریعہ گھروں کو پانی سربراہ کرنے کا وعدہ کرنے والے چیف منسٹر سستی شراب کو گھروں تک پہونچاتے ہوئے سماجی بگاڑ کا موجب بن رہے ہیں ۔ سستی شراب عام ہوتے ہی خواتین پر مظالم کے واقعات میں مزید اضافہ ہوجائے گا ۔ بچوں کی کفالت ، تعلیم اور لڑکیوں کی شادی مسئلہ بن جائے گی ۔ حکومت کی نئی اکسائز پالیسی کے خلاف مختلف خواتین کی تنظیمیں احتجاج کررہی ہیں جس کی کانگریس پارٹی مکمل تائید کرے گی ۔۔

TOPPOPULARRECENT