Saturday , August 19 2017
Home / Top Stories / نواز شریف نے اقوام متحدہ میں مسئلہ کشمیر اٹھایا ، 4 نکاتی امن تجویز پیش

نواز شریف نے اقوام متحدہ میں مسئلہ کشمیر اٹھایا ، 4 نکاتی امن تجویز پیش

اقوام متحدہ ۔ 30 ستمبر (سیاست ڈاٹ کام) وزیراعظم پاکستان نوازشریف نے مسئلہ کشمیر اٹھاتے ہوئے کہا کہ اس کی عدم یکسوئی سے اقوام متحدہ کی ناکامی کا اظہار ہوتا ہے۔ انہوں نے 4 نکاتی ’’امن پیشرفت‘‘ کی تجویز پیش کی، جس میں کشمیر کو فوج سے پاک کرنا اور سیاچن سے فوج کی غیرمشروط دستبرداری شامل ہیں۔ اقوام متحدہ جنرل اسمبلی سے خطاب کرتے ہوئے انہوں نے دونوں ممالک کی جانب سے کسی بھی طرح کے حالات میں طاقت کے استعمال یا اس طرح کی دھمکیوں سے گریز کرنے کی بھی تجویز دی۔ انہوں نے کہا کہ 2003ء سرحدی جنگ بندی کو اس فارمولہ کا ایک حصہ بنایا جائے تاکہ دو نیوکلیئر مسلح پڑوسی ممالک کے مابین امن روابط یقینی ہوسکیں۔ نواز شریف نے کہاکہ ’’محاذ آرائی نہیں بلکہ تعاون‘‘ ہمارے روابط کی بنیاد ہونی چاہئے۔ انہوں نے مسئلہ کشمیر کی جلد از جلد یکسوئی اور ہندوستان و پاکستان کے مابین سیکوریٹی کو یقینی بنانے کی ضرورت ظاہر کی۔ اس کے ساتھ ساتھ انہوں نے کہا کہ کشمیری عوام کے ساتھ مشاورت بھی ناگزیر ہے کیونکہ وہ اس تنازعہ کا اٹوٹ حصہ ہیں اور پرامن حل تلاش کرنے کیلئے انہیں بھی مذاکرات کا حصہ بنانا ہوگا۔ نواز شریف نے کہا کہ عہدہ سنبھالنے کے بعد سے انہوں نے ہندوستان کے ساتھ بہتر روابط کو اولین ترجیح دی اور کہاکہ دونوں ممالک کو کشیدگی کی وجوہات سے نمٹنا اور اسے حل کرنا چاہئے وہ تمام ممکنہ اقدامات کے ذریعہ کشیدگی کو مزید بڑھنے سے روکیں۔ اسی وجہ سے وہ ہندوستان کے ساتھ نئی امن پیشرفت کی تجویز پیش کررہے ہیں۔ اس کا آغاز ان اقدامات سے ہو جو آسان اور قابل عمل ہیں۔

TOPPOPULARRECENT