Thursday , June 22 2017
Home / کھیل کی خبریں / نیوزی لینڈ کو شکست ‘ انگلینڈ سیمی فائنل میں داخل

نیوزی لینڈ کو شکست ‘ انگلینڈ سیمی فائنل میں داخل

کارڈیف۔7 جون (سیاست ڈاٹ کام )انگلینڈ نے جیک بال اور لیام پلنکٹ کی عمدہ بولنگ کی بدولت نیوزی لینڈ کو باآسانی 97 رنز سے شکست دے کر چیمپیئنز ٹرافی کے سیمی فائنل میں رسائی حاصل کرنے والی پہلی ٹیم بن گئی ہے۔ کارڈف میں کھیلے گئے گروپ اے کے اہم میچ میں نیوزی لینڈ نے ٹاس جیت کر پہلے فیلڈنگ کا فیصلہ کیا۔اوپنرز نے انگلینڈ کو 37 رنز کا آغاز فراہم کیا ہی تھا کہ جیسن رائے 13 رنز بنانے کے بعد پویلین لوٹ گئے۔اس کے بعد گزشتہ میچ کے مین آف دی میچ جو روٹ  وکٹ پر آئے اور انہوں نے ہیلز کے ساتھ مل کر مجموعے کو 118 تک پہنچا دیا۔ اس موقع پر انگلینڈ کو یکے بعد دیگرے دو نقصان اٹھانے پڑے اور 56 رنز بنانے والے ہیلز کے بعد مورگن بھی جلد ہی پویلین لوٹ گئے۔روٹ نے اپنی پیش قدمی جاری رکھی اور بین اسٹوکس کے ساتھ مل کر اسکور کو 188 تک پہنچا دیا، وہ 64 رنز بنانے کے بعد کوری اینڈرسن کی گیند پر اپنی وکٹیں محفوظ نہ رکھ سکے۔اس دوران انگلش ٹیم نے وقفے وقفے سے وکٹیں گنوا شروع کردیا اور بین اسٹوکس 48، معین علی 12، عادل رشید 12 رنز بنانے کے بعد پویلین لوٹے۔جلد وکٹیں گرنے سے انگلینڈ کی بڑے اسکور کی امیدیں ماند پڑتی نظر آنے لگیں لیکن جوز بٹلر نے اختتامی اوورز میں شاندار بیٹنگ کرتے ہوئے اپنی ٹیم کو 300 کا ہندسہ پار کروایا۔انگلینڈ کی پوری ٹیم 49.3 اوورز میں 310 رنز بنا کر آؤٹ ہو گئی، بٹلر 61 رنز بنا کر ناقابل شکست رہے۔نیوزی لینڈ کی جانب سے کوری اینڈرسن اور ایڈم ملنے نے فی کس تین جبکہ ٹم ساؤدھی نے دو وکٹیں لیں۔ ہدف کے تعاقب میں لیوک رونچی گولڈن ڈک پر آؤٹ ہو کر اپنی ٹیم کو مشکلات کا شکار بنا گئے لیکن کین ولیمسن اور مارٹن گپٹل نے 62 رنز کی ساجھے داری قائم کر کے ابتدائی نقصان کا ازالہ کرنے کی کوشش کی۔گپٹل کے پویلین لوٹنے کے بعد روس ٹیلر میدان میں اترے اور کپتان کے ساتھ 95 رنز جوڑ کر ہدف تک رسائی کی راہ ہموار کرنے کی کوشش کی لیکن اسی اسکور پر مارک ووڈ نے 87 رنز کی اننگز کھیلنے والے کیوی کپتان کی اننگز کا خاتمہ کر کے نیوزی لینڈ کو بڑا نقصان پہنچایا۔ولیمسن کے آؤٹ ہونے کے بعد 10 رنز کے اضافے سے ٹیلر بھی پویلین لوٹ گئے جس کے بعد نیوزی لینڈ کی ٹیم سنبھل نہ سکی اور وقفے وقفے سے وکٹیں گنواتے ہوئے پوری ٹیم 223 رنز پر پویلین لوٹ گئی۔انگلینڈ کی جانب سے لیام پلنکٹ نے چار وکٹیں لیں لیکن آٹھ اوورز میں دو میڈن سمیت 31 رنز کے عوض دو وکٹیں لینے والے جیک بال کو میچ کا بہترین کھلاڑی قرار دیا گیا۔

Leave a Reply

TOPPOPULARRECENT