Monday , October 23 2017
Home / Top Stories / ٹماٹر کی قیمت میں بے تحاشہ اضافہ

ٹماٹر کی قیمت میں بے تحاشہ اضافہ

حکومت کا نئی فصل پر انحصار ، اشیائے مایحتاج کی مہنگائی پر آج جائزہ اجلاس
نئی دہلی۔ 17 نومبر (سیاست ڈاٹ کام) پیاز اور دالوں کے بعد اب ٹماٹر کی قیمت آسمان چھونے لگی ہے۔ اندرون ایک ماہ روزمرہ کی ضرورت سمجھے جانے والے ٹماٹر کی قیمت میں 50% کا اضافہ ہوا اور یہ 62 روپئے فی کیلو تک پہنچ گئی ہے۔ حکومت کا یہ موقف ہے کہ نئی فصل آنے کے بعد قیمت اعتدال پر آجائے گی۔ ملک کے مختلف حصوں میں اس وقت ٹماٹر کی قیمت میں بے تحاشہ اضافہ ہوگیا ہے اور وزارت فوڈ اینڈ کنزیومر افیئرس  نے ایک بیان میں کہا ہے کہ کل ایک اعلیٰ سطح کا اجلاس طلب کیا گیا ہے جس میں اشیائے ضروریہ کی قیمتوں اور دستیابی کا جائزہ لیتے ہوئے ضروری اقدامات پر غوروخوض کیا جائے گا۔ دہلی میں جہاں ایک ماہ قبل ٹماٹر 41 روپئے فی کیلو تھے اب اس کی قیمت بڑھ کر 62 روپئے فی کیلو ہوگئی ہے۔ ملک کے تقریباً تمام بڑے شہروں میں ٹماٹر کی قیمت 50 روپئے فی کیلو سے زائد ہے، جبکہ اس کی قیمت ایک ماہ قبل 30 روپئے فی کیلو تھی۔ گزشتہ ہفتہ پیاز کی قیمت میں کسی قدر اضافہ ہوا ہے اور ساتھ ہی ساتھ ٹماٹر کی قیمت میں بے تحاشہ اضافہ دیکھا گیا۔ اس کی وجہ جنوبی ریاستوں سے سربراہی میں رکاوٹ ہے، کیونکہ یہ ریاستیں گزشتہ ایک ہفتہ سے غیرمتوقع اور تباہ کن بارش سے دوچار ہیں۔ وزارتِ کنزیومر افیئرس نے ایک بیان میں کہا کہ یہ اضافہ توقع ہے کہ عارضی ہوگا اور بہت جلد معمول کی سربراہی بحال ہوجائے گی۔ اس کے علاوہ ٹماٹر کی نئی فصل کی آمد قیمت میں کمی ہوگی۔ مرکز نے کہا ہے کہ وہ اشیائے مایحتاج کی قیمت پر مختلف وجوہات کی بناء دباؤ کی صورتحال پر قریبی نظر رکھے ہوئے ہے۔ سربراہی اور طلب میں فرق کے علاوہ سنگین ماحولیاتی حالات نے ایسی صورتِ حال پیدا کی ہے۔ ستمبر تا ڈسمبر کے دوران طلب پوری نہ ہونے کی وجہ سے قیمتوں میں کسی قدر اضافہ ہوا ہے۔ مرکز اس معاملے میں ریاستی حکومتوں کے ساتھ ربط قائم کرتے ہوئے موثر اقدامات یقینی بنارہا ہے۔ حکومت نے کہا ہے کہ پیاز کی قیمت جو ایک ہفتہ قبل 36.82 روپئے فی کیلو تھی، بڑھ کر 37.52 روپئے فی کیلو ہوگئی ہے۔ دالوں کی قیمتوں میں اضافہ ہوا ہے۔ تور دال کی قیمت 149.91 روپئے سے بڑھ کر 151.67 روپئے فی کیلو ہوگئی ہے۔ اسی طرح اُردھ دال کی قیمت جو گزشتہ ہفتہ 137.06 روپئے تھی ، بڑھ کر 141.47 روپئے فی کیلو ہوگئی ہے۔

TOPPOPULARRECENT