Monday , September 25 2017
Home / شہر کی خبریں / ڈپٹی چیف منسٹر کڈیم سری ہری غش کھا کر گرپڑے

ڈپٹی چیف منسٹر کڈیم سری ہری غش کھا کر گرپڑے

ورنگل میں یوم تاسیس تقریب کے موقع پر دوران تقریر واقعہ
حیدرآباد 2 جون ( پی ٹی آئی ) ڈپٹی چیف منسٹر تلنگانہ مسٹر کڈیم سری ہری آج ورنگل شہر میں ایک تقریب کے دوران تقریر کرتے ہوئے غش کھا کر گر پڑے ۔ کہا گیا ہے کہ ریاست میں شدت کی گرمی کے سبب وہ دوران تقریر غش کھا گئے ۔ یہ تقریب تیسرے یوم تاسیس تلنگانہ کے سلسلہ میں منعقد کی گئی تھی ۔ کڈیم سری ہری نے پولیس پریڈ گراونڈ پر منعقدہ پریڈ کی سلامی لی اور تقریر کرتے ہوئے اچانک شہ نشین پر گرپڑے ۔ تاہم سکیوریٹی اہلکار جو ان کے پیچھے کھڑے تھے فوری حرکت میں آگئے اور انہیں نیچے گرنے سے روک دیا ۔ ورنگل کے پولیس کمشنر جی سدھیر اببو نے کہا کہ 9.35 بجے صبح جب ڈپٹی چیف منسٹر تقریر کر رہے تھے انہوں نے قدرے غشی محسوس کی اور گرپڑے ۔ وہ ابھی نیچے گر ہی رہے تھے کہ وہ اور دوسرے پولیس عہدیدار ان تک پہونچے اور انہیں سنبھالا ۔ جب وہ غش کھا گئے تھے انہیں کار تک منتقل کیا گیا اور او آر ایس دیا گیا ۔ اس کے بعد ڈاکٹرس نے ڈپٹی چیف منسٹر کا معائنہ کیا ۔ ڈپٹی چیف منسٹر بعد میں ہوش میں آگئے ۔ اندرون پانچ منٹ وہ دوبارہ شہ نشین پر پہونچے اور اپنی تقریر مکمل کی ۔ کمشنر پولیس نے فون پر پی ٹی آئی کو یہ بات بتائی ۔ مسٹر کڈیم سری ہری نے بعد میں تلنگانہ یوم تاسیس کے موقع پر منعقدہ رنگا رنگ کلچرل پروگرام کا مشاہدہ بھی کیا ۔ ڈپٹی چیف منسٹر وہاں سے اپنے گھر گئے اور تقریبا ایک گھنٹہ آرام کرنے کے بعد انہوں نے ورنگل کے مختلف علاقوں میں منعقدہ دوسرے پروگراموں میں بھی شرکت کی ۔ ڈاکٹرس کی ایک ٹیم نے ان کے معائنے بھی کئے ۔

TOPPOPULARRECENT