حیدرآباد 20 ستمبر (سیاست نیوز) بی جے پی نے آج یہاں اس کے پارٹی آفس پر ایک اہم میٹنگ منعقد کرتے ہوئے 17 ستمبر کو یوم آزادی تلنگانہ کو سرکاری طور پر منانے کا اعلان کرنے کے پارٹی کے مطالبہ کے نتائج کا جائزہ لیا اور اس مسئلہ پر تبادلہ خیال کیا۔ اس اجلاس میں ڈاکٹر لکشمن صدر تلنگانہ بی جے پی یونٹ، سابق گورنر مہاراشٹرا ودیا ساگر راؤ، این اندرسین ریڈی نیشنل ایگزیکٹیو ممبر نے بحیثیت مہمان خصوصی شرکت کی۔ پارٹی ترجمان مسٹر کرشنا ساگر راؤ نے اخباری نمائندوں کو اس اجلاس کی تفصیلات سے واقف کرواتے ہوئے کہاکہ اجلاس میں یہ طے کیا گیا کہ آئندہ سال 17 ستمبر کو سرکاری طور پر یوم آزادی تلنگانہ منانے کا اعلان کرنے کے لئے چیف منسٹر کے سی آر پر کافی دباؤ ڈالا جائے گا۔
