سرمایہ کاروں کوپیسے واپس کرنے اڈانی انٹرپرائزز لمیٹڈ کے چیئرمین گوتم اڈانی کا اعلان
نئی دہلی :اڈانی گروپ نے اپنے 20,000 کروڑ روپے کے ایف پی او یعنی فالو اپ پبلک آفر کو منسوخ کرنے کا اعلان کیا ہے۔ اڈانی انٹرپرائزز لمیٹڈ کے چیئرمین گوتم اڈانی نے کہا ہے کہ مارکیٹ میں اتار چڑھاؤ کو دیکھتے ہوئے کمپنی کے بورڈ نے ایف پی او کو منسوخ کرنے کا فیصلہ کیا ہے۔ گوتم اڈانی نے کہا کہ کمپنی نے یہ فیصلہ اسٹاک مارکیٹ میں زبردست ہلچل اور مارکیٹ میں اتار چڑھاؤ کے پیش نظر سرمایہ کاروں کے مفادات کو مدنظر رکھتے ہوئے کیا ہے۔ انہوں نے کہا کہ وہ ایف پی او سے وصول کی گئی رقم سرمایہ کاروں کو واپس کر دیں گے اور اس سے متعلق لین دین بند کر دیں گے۔ اڈانی گروپ کا یہ غیر معمولی فیصلہ ہنڈن برگ ریسرچ رپورٹ کے جاری ہونے کے بعد گروپ کے شیئرز میں زبردست گراوٹ کے درمیان آیا ہے۔ ہنڈن برگ کی رپورٹ نے اس گروپ پر انتہائی بے باک انداز میں حصص کے غلط استعمال اور اکاؤنٹس میں جعل سازی کا الزام لگایا ہے۔اس رپورٹ کے جواب میں اڈانی گروپ نے ہنڈن برگ کی ساکھ اور رپورٹ کے وقت پر سوال اٹھائے ہیں۔ کمپنی نے اپنے جواب میں کہا ہے کہ یہ رپورٹ محض ایک مخصوص کمپنی پر غیر ضروری حملہ نہیں ہے بلکہ ہندوستان، ہندوستانی اداروں کی آزادی، سالمیت اور معیار پر منظم حملہ ہے۔ اڈانی گروپ نے اس رپورٹ کو ہندوستان کی ترقی کی کہانی اور ہندوستان کے عزائم پر حملہ قرار دیا ہے۔اہم بات یہ ہے کہ ہنڈن برگ کی رپورٹ سامنے آنے کے بعد، اڈانی گروپ کی کمپنیوں کے حصص میں پچھلے پانچ تجارتی سیشنوں میں زبردست گراوٹ درج کی گئی ہے اور کمپنی کو اپنی کل مارکیٹ کیپٹلائزیشن میں 7 لاکھ کروڑ سے زیادہ کا نقصان ہوا ہے۔چہارشنبہ کو بی ایس ای پر اڈانی انٹرپرائزز کے حصص 26 فیصد سے زیادہ گر کر 2,180.20 روپے پر بند ہوئے۔
اسی دوران یہ خبر بھی آئی کہ کریڈٹ سوئس نے اڈانی کمپنیوں کے بانڈز کو قبول کرنا بند کر دیا ہے جنہیں مارجن کریڈٹ کے لیے گروی رکھا گیا ہے۔اس کے علاوہ اڈانی گروپ کی ایک اور کمپنی اڈانی پورٹس بھی 20 فیصد گر کر 492.15 پر بند ہوئی۔ اسی طرح کمپنی کی ملکیت امبوجا سیمنٹ کے حصص بھی 16.56 فیصد گر کر 334.60 روپے پر بند ہوئے، جبکہ اے سی سی 5.96 فیصد گر کر 1,852 روپے پر بند ہوا۔یہ سمجھنا ضروری ہے کہ فالو آن پبلک آفر (FPO) کیا ہے؟ دراصل، ایک کمپنی کے پاس پیسہ اکٹھا کرنے کا یہ ایک طریقہ ہے۔ وہ کمپنی جو پہلے ہی اسٹاک مارکیٹ میں درج ہے، سرمایہ کاروں کو نئے حصص پیش کرتی ہے۔ یہ حصص مارکیٹ میں موجود حصص سے مختلف ہیں۔