راشٹر پتی بھون میں شاندار استقبال کے بعد سعودی عرب کے ولی عہد محمد بن سلمان اور ان کے ساتھ آئے وفد نے وزیر اعظم نریندر مودی کے ساتھ ظہرانہ کی دعوت میں شرکت کی۔
ہندوستان کے دورے پر آئے سعودی عرب کے ولی عہد محمد بن سلمان کو بدھ کے روز راشٹر پتی بھون میں صدر رام ناتھ کووند اور وزیر اعظم نریدنر مودی کی طرف سے ریاستی استقبال کیا گیا۔ اس دوران انہوں نے کہا کہ ہندوستان اور عرب کے درمیان کی دوستی ہمارے خون میں ہے۔
سعودی ولی عہد محمد بن سلمان کے ہندوستان پہنچنے پر دہلی کے حیدرآباد ہاؤس میں وزیر اعظم نریندر مودی کی طرف سے ان کے اعزاز میں ظہرانہ کا اہتمام کیا گیا۔ شہزادہ محمد بن سلمان اور ان کے وفد کے لئے لنچ میں نان ویج میں روغن جوش، تندوری گلابی مچھلی، قیمہ سموسہ شامل تھا۔
وہیں ویجیٹیرین کھانے میں دال مکھنی، بدین جام اور کرکری تلی بھنڈی، گول گپے، روا ٹوسٹ، پاک چیز سموسے، پنین کالی مرچ شامل تھا۔ اس کے ساتھ ہی میٹھے میں قیصر جلیبی، گلاب جامن اور فالودہ کے ساتھ شاہی قلفی کا انتظام تھا۔ لنچ میں دارجیلنگ کی چائے، جنوبی ہند کی کافی اور قہوہ بھی پیش کیا گیا۔
لنچ کے علاوہ وزیر اعظم کی طرف سے شہزادہ سلمان کے لئے سرود کنسرٹ بھی منعقد کیا گیا۔ اس میں ویشنو جن تو تینے کہیے، کیسریا بالم پدھارو مارو دیش، موہے پن گھٹ پے نند لال اور لگ جا گلے سمیت 12 گانوں کی دھنوں کو پیش کیا گیا۔
سعودی عرب کے شاہ سلمان کے ولی عہد شہزادہ محمد بن سلمان نے پہلے وزیر خارجہ سشما سوراج اور پھر وزیر اعظم نریندر مودی سے ملاقات کی۔ اس ملاقات کے بعد وزیر اعظم نریندر مودی نے جہاں سعودی عرب کے ساتھ ہندوستان کے تعلقات کا ذکر کیا وہیں، محمد بن سلمان نے بھی دہشت گردی کے خلاف جنگ میں ہندوستان کو ہر ممکن مدد کی یقین دہانی کرائی۔