نئی دہلی: لوک سبھا کے اسپیکر اوم برلا نے نئی دہلی کے کانسٹی ٹیوشن کلب سے کار ریلی کو جھنڈی دکھا کر روانہ کیا۔ کار ریلی میں ارکان پارلیمنٹ کے علاوہ دفاعی اور پیرا ملٹری فورسز کے افسران، صنعت کے علاوہ زندگی کے مختلف شعبوں سے تعلق رکھنے والے افراد نے شرکت کی۔ اس سال کی کار ریلی کا تھیم ‘روڈ سیفٹی’ ہے۔ اس موقع پر برلا نے کہا کہ ملک میں سڑکوں کے نیٹ ورک کی لمبائی اور معیار میں بے مثال اضافہ ہوا ہے۔ نیز ہماری شاہراہیں اور سڑکیں تعداد، لمبائی اور معیار میں بڑھ رہی ہیں۔ مشن گتی شکتی کے ذریعے جہاں ایک طرف لوگوں کی سماجی و اقتصادی زندگی میں تاریخی تبدیلیاں آئی ہیں وہیں دوسری طرف سڑک حادثات کی تعداد میں اضافہ ہو رہا ہے۔ سڑک حادثات میں جانیں گنوانے والوں کی تعداد میں اضافہ ہو رہا ہے جو کہ تشویشناک بات ہے برلا نے بتایا کہ ہمارے ملک میں ہر سال 4 لاکھ سے زیادہ حادثات ہوتے ہیں اور اس میں ہر سال 1.5 لاکھ سے زیادہ لوگ مر جاتے ہیں۔ اگر ایک سال کے روڈ ایکسیڈنٹ کا معاشی طور پر اندازہ لگایا جائے تو یہ ہماری جی ڈی پی کے تقریباً 1 فیصد کے برابر ہوگا۔ انہوں نے کہا کہ سڑک حادثات خاندان، معاشرے اور ملک کا نقصان ہیں۔ روڈ سیفٹی پر بات کرتے ہوئے لوک سبھا اسپیکر برلا نے کہا کہ ٹریفک کے قوانین، سڑک پر چلنے سے متعلق چیزیں سبھی جانتے ہیں، لیکن وہ ان پر عمل نہیں کرتے، اگر ہم چھوٹی چھوٹی باتوں پر توجہ دیں، ٹریفک قوانین پر عمل کریں، تو ہم کامیاب ہو جائیں گے۔ اپنے آپ کو محفوظ رکھنے کے ساتھ ساتھ سڑک پر چلنے والے دوسرے لوگوں کو بھی تحفظ فراہم کریں۔
