Thursday , November 23 2017
Home / شہر کی خبریں / بلدی انتخابات سے قبل فہرست رائے دہندگان میں ترمیم کا عمل

بلدی انتخابات سے قبل فہرست رائے دہندگان میں ترمیم کا عمل

خامیوں کو دور کرنے پر توجہ ۔ یکم نومبر کو جی ایچ ایم سی حدود میں خصوصی مہم کا انعقاد
حیدرآباد ۔ /27 اکٹوبر (سیاست نیوز) شہر حیدرآباد میں بلدیہ کے انتخابات سے قبل فہرست رائے دہندگان میں ترمیم اور نقائص سے پاک بنانے کے اقدامات کا عمل جاری ہے ۔ قومی سطح پر الیکشن کمیشن آف انڈیا کی جانب سے جاری کردہ ہدایات کے مطابق مجلس بلدیہ عظیم تر حیدرآباد کے حدود میں موجود فہرست رائے دہندگان میں ناموں کی شمولیت ، تنقیح اور اعتراضات کا عمل جاری ہے اور اس سلسلے میں خصوصی مہم یکم نومبر کو صبح 10 بجے تا شام 5 بجے چلائی جائے گی ۔ تمام مراکز رائے دہی پر رائے دہندے اپنے ناموں کی شمولیت کو یقینی بناسکتے ہیں یا پھر پتے وغیرہ کی تبدیلی کے عمل کو بھی پورا کیا جاسکتا ہے ۔ فہرست رائے دہندگان میں شمولیت کیلئے /4 نومبر آخری تاریخ مقرر کی گئی ہے ۔ اس سے قبل شہریوں کو چاہئیے کہ وہ اس موقع سے استفادہ حاصل کرتے ہوئے فہرست رائے دہندگان میں ناموں کی شمولیت کو یقینی بنائیں ۔ علاوہ ازیں شہری یکم نومبر کو اپنے مراکز رائے دہی پہونچ کر موجودہ فہرست رائے دہندگان کا جائزہ لیتے ہوئے طمانیت حاصل کرسکتے ہیں ۔ نئے ناموں کی شمولیت کے علاوہ اس مہم کے دوران تصحیح ، تنقیح اور اعتراضات داخل کرنے کی بھی گنجائش رہے گی ۔ سابق میں فہرست رائے دہندگان میں ایک ہی رائے دہندے کے نام ایک سے زائد بار موجود رہنے کی شکایات موصول ہوئی تھیں ۔ اس نقص کو پاک کرنے کیلئے بھی ضروری ہے کہ اس مہم کے دوران اعتراضات داخل کئے جائیں تاکہ شہر حیدرآباد کے 15 اسمبلی حلقہ جات میں فہرست رائے دہندگان کو بہتر بنایا جاسکے ۔ کمشنر مجلس بلدیہ عظیم تر حیدرآباد مسٹر سومیش کمار کے بموجب اس مہم کے متعلق عوام میں شعور بیداری ضروری ہے ۔ چونکہ فہرست رائے دہندگان میں ناموں کی شمولیت اور شناختی کارڈ کی موجودگی شہریوں کو فائدہ بخش ثابت ہوتی ہے ۔ علاوہ ازیں شہری اس شناختی کارڈ کو قومی سطح پر استعمال کرسکتے ہیں ۔ ضلع حیدرآباد میں چلائے جانے والی اس مہم کے دوران رائے دہندے اپنی ضرورت کے مطابق فارم 6, 7, 8  اور 8A میں ضروری اندراجات کرتے ہوئے فہرست رائے دہندگان کو درست بنانے تعاون کرسکتے ہیں ۔ یکم / نومبر کو چلائی جانے والی خصوصی مہم کے دوران تمام مراکز رائے دہی پر بوتھ لیول آفیسرس موجود رہیں گے جو شہریوں سے درخواستیں حاصل کرکے ناموں کی شمولیت میں مدد کریں گے ۔

TOPPOPULARRECENT