Thursday , November 23 2017
Home / کھیل کی خبریں / دنیا کے پہلے ایرکنڈیشنڈ اسٹیڈیم کا قطر میں افتتاح

دنیا کے پہلے ایرکنڈیشنڈ اسٹیڈیم کا قطر میں افتتاح

دوحہ ۔20 مئی  (سیاست ڈاٹ کام) قطر میں فیفا فٹبال ورلڈ کپ 2022 سے دو ہزار دن قبل دنیا کے پہلے ایرکنڈیشند اسٹیڈیم کا افتتاح کردیا گیا جو قطر میں ہونے والے ورلڈ کپ کا پہلا مکمل میدان ہے۔خلیفہ انٹرنیشنل اسٹیڈیم میں اعلیٰ معیاری کولنگ ٹیکنالوجی کی تنصیب کی گئی ہے جس کے ساتھ ہی یہ دنیا کا پہلا مکمل طور پر ایرکنڈیشنڈ اسٹیڈیم بن گیا ہے جس کا مقصد قطر کے گرم موسم میں بھی شائقین کو پرسکون اور ٹھنڈا ماحول فراہم کرنا ہے۔ مذکورہ اسٹیڈیم تکمیل کے ساتھ ہی ملک کے سب سے بڑے ڈومیسٹک کپ مقابلے ’امیر کپ فائنل‘ کی میزبانی کرے گا۔ یہ اسٹیڈیم 1976 میں پہلی مرتبہ تعمیر کیا گیا تھا اور اس کے بعد سے اب تک اس کی دو مرتبہ وسیع پیمانے پر تزئین و آرائش کے علاوہ توسیع کی گئی ہے۔اس اسٹیڈیم میں 40ہزار افراد کے بیٹھنے کی گنجائش ہے جہاں یہ ورلڈ کپ کے کوارٹر فائنل راؤنڈ تک کے مقابلوں کی میزبانی کرے گا۔ اسٹیڈیم میں نصب جدید کولنگ سسٹم شائقین کو خوشگوار ماحول فراہم کرے گا اور 23ڈگری سینٹی گریڈ پر درجہ حرارت کو برقرار رکھے گا۔ اس سسٹم کو بنانے والے قبر یونیورسٹی کے ڈاکٹر سعود غنی کا ماننا ہے کہ روئے زمین پر ایسا کوئی بھی مقامی نہیں جہاں کھلی فضا میں ایر کنڈیشنڈ اسٹیڈیم بنایا گیا ہو اور یہ عام سسٹم کے مقابلے 40 فیصد کم بجلی استعمال کرے گا۔قطر میں سخت گرم موسم کے پیش نظر ورلڈ کپ کا انعقاد جون اور جولائی کی بجائے نومبر اور دسمبر کے مہینوں میں کیا جائے گا۔ یہ وہی اسٹیڈیم ہے جہاں 1992 میں قطر نے اپنی فٹبال کی تاریخ کی اہم کامیابی حاصل کرتے ہوئے 1992 کا گلف کپ جیتا تھا جبکہ اسی گراؤنڈ پر سعودی عرب نے ایران کو شکست دے کر پہلی مرتبہ ورلڈ کپ کیلئے کوالیفائی کرنے کا اعزاز حاصل کیا تھا۔اس اسٹیڈیم کی تزئین و آرائش اور ازسرنو تعمیر پر کم و بیش 90ملین ڈالرس خرچ کئے گئے ہیں جہاں قبر ورلڈ کپ مقابلوں کیلئے میدان اور ٹریننگ گراؤنڈ کی تعمیر پر 10ارب ڈالرس کی خطیر رقم خرچ کرے گا۔ورلڈ کپ 2022 کی قطر انتظامی کمیٹی کے عہدیدار نے دعویٰ کیا کہ ورلڈ کپ میں 13 لاکھ سے زائد افراد قطر کا رخ کریں گے جہاں ملک کی اپنی آبادی تقریباً 26 لاکھ نفوس پر مشتمل ہے۔یاد رہے کہ 2014 ورلڈ کپ میں 10 لاکھ سے زائد افراد نے ایونٹ کے میچز سے لطف اندوز ہونے کیلئے برازیل کا رخ کیا تھا۔

TOPPOPULARRECENT