Wednesday , December 19 2018

دہلی میں اچانک گرد کا طوفان ‘پروازیںتبدیل

یوپی میں گرج چمک کے ساتھ بارش اور گرد کے طوفان کی محکمہ موسمیات کی پیش قیاسی
نئی دہلی ۔ 13مئی ( سیاست ڈاٹ کام ) دہلی میں آج شام دن بھر شدید گرمی کے بعد اچانک ہلکی بارش ہوئی اور 109کلومیٹر فی گھنٹہ کی رفتار سے آندھی آئی جس کی وجہ سے آسمان آبرآلود ہوگیا ۔ 4:30بجے دن پورے قومی دارالحکومت میں تیز رفتار آندھی چلنے لگی ۔ دہلی میں موسم اچانک تبدیل ہوجانے کی وجہ سے ایئرپورٹ کے عہدیداروں نے کم از کم 10اندرون ملک پروازوں کا رُخ موڑ دیا ۔ ایک عہدیدار کے بموجب سرینگر ۔ دہلی شاہراہ پر حدبصارت بہت کم ہوگئی تھی ‘ اس لئے دہلی پہنچنے والے تمام طیاروں کا رُخ امرتسر موڑ دیا گیا ۔ لکھنو ۔ دہلی پرواز بھی لکھنو واپس کردی گئی جہاں نسبتاً بہتر موسم تھا ‘ تاہم دہلی کے شہریوں کو شدید گرمی سے راحت حاصل ہوئی ۔ اعظم ترین درجہ حرارت 40.60 درجہ سلسیس تک پہنچ گیا تھا ‘ جو معمول سے ایک مقام زیادہ تھا ۔ محکمہ موسمیات کے عہدیدار نے کہا کہ صبح کے وقت رطوبت 60فیصد ریکارڈ کی گئی ۔ محکمہ موسمیات نے کل پیش قیاسی کی تھی کہ اتراکھنڈ ‘ جموں و کشمیر اور ہماچل پردیش میں گرج چمک کے ساتھ بارش ہوگی اور تیز رفتار آندھی چلے گی ۔ راجستھان کے چند علاقوں میں گرد کا طوفان آنے کی پیش قیاسی کی گئی تھی ‘ تاہم شمالی ہند کی ریاستوں میں خاص طور پر میدانی علاقوں میں مغربی خلل اندازی کی وجہ سے گرد کا طوفان نہیں دیکھا گیا ۔ گرج چمک کے ساتھ تیز رفتار ہوائیں بھی پنجاب ‘ ہریانہ ‘ چندی گڑھ ‘ دہلی ‘ مغربی اترپردیش ‘ ودربھا ‘ کرناٹک ‘ ٹاملناڈو ‘ پوڈیچری ‘ لکشادیپ ‘ کیرالا ‘ چھتیس گڑھ ‘ بہار ‘ تلنگانہ ‘ شمالی ساحلی آندھراپردیش ‘ جنوبی داخلی کرناٹک میں ہونے کا اندیشہ تھا ۔ لکھنو سے موصولہ اطلاع کے بموجب گرج چمک کے ساتھ بارش ‘ گرد کا طوفان اور تیز رفتار ہوائیں جن کی رفتار 60تا 70کلومیٹر فی گھنٹہ تھی امکان ہے کہ کل یو پی کے 26اضلاع میں دیکھی جائیں گی ۔ محکمہ موسمیات کی اطلاع کے بموجب یکادکا مقامات پر بارش ہونے کا بھی اندیشہ ہے ۔ 9مئی کو شدید طوفان سے 18افراد ہلاک اور دیگر 27 زخمی ہوگئے تھے ۔ گرج چمک کے ساتھ بارش اور بجلی کڑکنے کی وجہ سے 2تا 3مئی 134 افراد ہلاک ہوئے تھے۔

TOPPOPULARRECENT