Tuesday , July 17 2018
Home / شہر کی خبریں / زندہ دلان حیدرآباد کی دو روزہ سالانہ تقاریب کا آج ادبی اجلاس سے آغاز

زندہ دلان حیدرآباد کی دو روزہ سالانہ تقاریب کا آج ادبی اجلاس سے آغاز

لندن کی ادبی سرگرمیوں کے روح رواں مصطفی شہاب کی شرکت
حیدرآباد ۔ 23 ۔ نومبر : ( پریس نوٹ ) : زندہ دلان حیدرآباد کی دو روزہ سالانہ تقاریب کا آج شام 6 بجے تلگو یونیورسٹی آڈیٹوریم نامپلی میں ادبی اجلاس سے آغاز ہوگا ۔ اجلاس کی صدارت ڈاکٹر محمد علی رفعت آئی اے ایس صدر زندہ دلان حیدرآباد کریں گے ۔ پروفیسر م ن سعید ( بنگلور ) مہمان خصوصی ہوں گے ۔ ادبی اجلاس میں ملک کے ممتاز و مایہ ناز مزاح نگار مسرز ڈاکٹر فیاض احمد فیضی ( ممبئی ) ، اسد رضا ( دہلی ) ، ڈاکٹر فرزانہ فرح ( بھٹکل ) ، رؤف خوشتر ( بیجاپور ) ، ڈاکٹر عباس متقی ، ڈاکٹر ممتاز مہدی اور ڈاکٹر علیم خاں فلکی اپنے طنز و مزاح سے بھر پور مضامین سنائیں گے ۔ یہ مضامین اتنے پر مزاح ہوتے ہیں کہ سامعین داد و تحسین سے نوازتے ہوئے مسلسل قہقہے لگانے پر مجبور ہوجاتے ہیں ۔ جس کے باعث زندہ دلان حیدرآباد کے اس ادبی اجلاس کو عالمی شہرت حاصل ہے ۔ ادبی اجلاس کے کنوینر ڈاکٹر علیم خاں فلکی ہیں ۔ دو روزہ تقاریب کے دوسرے اور آخری دن یعنی ہفتہ 25 نومبر کو 10-30 بجے دن اسی مقام پر پروفیسر احمد اللہ خاں کی صدارت میں محفل لطیفہ منعقد ہوگی ۔ لندن کی ادبی سرگرمیوں کے روح رواں و ممتاز شاعر مصطفی شہاب مہمان خصوصی ہوں گے ۔ اس محفل میں ممتاز و معروف لطیفہ گو حضرات اپنے دلچسپ لطیفے پیش کریں گے ۔ جناب سردار اثر کنوینر محفل لطیفہ ہیں ۔ اسی دن شام 7-30 بجے تلگو للت کلاتھورانم ، باغ عامہ ، نامپلی میں جناب زاہد علی خاں مدیر اعلیٰ روزنامہ سیاست کی صدارت میں کل ہند مزاحیہ مشاعرہ منعقد ہوگا ۔ جناب شفیق الزماں آئی اے ایس ، جناب راجیو رتن آئی پی ایس ، ڈائرکٹر جنرل تلنگانہ فائر سرویس مہمانان خصوصی اور پروفیسر ایس اے شکور مہمان اعزازی ہوں گے ۔ اس مشاعرے میں عالمی شہرت یافتہ شعراء اور ممتاز میزبان شعراء اپنا تازہ مزاحیہ کلام سنائیں گے ۔ ڈاکٹر معین امر بمبو کنوینر اور فیروز رشید ناظم مشاعرہ ہیں ۔ داخلہ مفت رہے گا ۔ ان دو روزہ تقاریب کو نواب شاہ عالم خاں صاحب کے نام معنون کیا گیا ہے ۔۔

TOPPOPULARRECENT