Wednesday , December 12 2018

سلمان بٹ مسلسل نظر انداز کئے جانے سے مایوس

کراچی۔22 نومبر(سیاست ڈاٹ کام)اسپاٹ فکسنگ میں سزا یافتہ اوپنر سلمان بٹ نے مسلسل نظر انداز کئے جانے پر شدید مایوسی کا اظہار کرتے ہوئے کہا ہے کہ افسوس تو اس بات کا ہے کہ پاکستان سوپر لیگ کی کسی فرنچائز نے بھی ان کا انتخاب نہیں کیا۔سلمان بٹ نے کہا کہ وہ ڈومیسٹک کرکٹ میں گزشتہ برس رنز کے لحاظ سے دوسرے نمبر پر تھے لیکن پی ایس ایل میں گولڈ کیٹگری میں موجودگی پر بھی کسی فرنچائز نے ان کو قابل غور نہیں سمجھا اور اس مرتبہ بھی ایسا ہی ہوا جس کی وجہ انہیں خود بھی معلوم نہیں ہے۔ انہوں نے کہا کہ گزشتہ برس سے وہ انتہائی شاندار کارکردگی کا مظاہرہ کر رہے ہیں اور اگرچہ رواں سال ان کی کارکردگی پچھلے سیزن جیسی نہیں رہی لیکن پھر بھی وہ دوسروں سے بہتر رہے لیکن ان کو نظر انداز کر دیا گیا۔ سلمان بٹ کے بموجب وہ کچھ نہیں کہہ سکتے کہ پی سی بی انہیں دوبارہ ٹیم میں شامل ہونے کا موقع دینے کیلئے اپنے فیصلے پر نظر ثانی کرے گا یا نہیں اور نہ ہی وہ اس بارے میں کوئی وضاحت طلب کریں گے۔انہوں نے کہا کہ ان کا کام محنت کرنا اور اچھی کارکردگی کا مظاہرہ کرنا ہے جو وہ پوری ایمانداری سے کر رہے ہیں۔ بورڈ کو ان کی کارکردگی پر نظر رکھنا چاہئے اور ڈومیسٹک کرکٹ میں اچھی کارکردگی دکھانے والوں کا نام ٹیم میں جگہ بنانے کیلئے ضرور زیر غور لانا چاہئے۔ انہوں نے مزید کہا کہ پوری امید ہے کہ سلیکٹرز انہیں موقع دے کر شائقین کرکٹ کو مایوس نہیں کریں گے۔

TOPPOPULARRECENT