Wednesday , November 22 2017
Home / دنیا / شمالی اور جنوبی کوریا کشیدگی ختم کرنے پر متفق

شمالی اور جنوبی کوریا کشیدگی ختم کرنے پر متفق

سیول ۔ 25 اگست (سیاست ڈاٹ کام) شمالی کوریا نے جنوبی کوریا کے ساتھ ایک معاہدے کے تحت سرحد پر جاری کشیدگی کو کم کرنے کے لیے پروپیگنڈا نشریات بند کرنے پر اتفاق کیا ہے۔ خیال رہے کہ جنوبی کوریا نے جمعرات کو سرحد پر بارودی سرنگ کے پھٹنے کے نتیجے میں اس کے دو فوجی زخمی ہونے کے بعد یہ پروپیگنڈا نشریات شروع کی تھیں۔ شمالی کوریا نے جنوبی کوریا کی پروپیگنڈا نشریات روکنے کے لیے طاقت کے استعمال کی دھمکی دی تھی جس سے دونوں ممالک کے درمیان کشیدگی میں اضافہ ہوا تھا۔ اس تنازعہ کو حل کرنے کے لیے دونوں ممالک کے درمیان اعلیٰ سطحی مذاکرات دو دن سے جاری تھے۔ جنوبی کوریا کے ایک مذاکرات کار کا کہنا ہے کہ یہ معاہدہ شمالی کوریا کی جانب سے اس واقعہ پر ’افسوس‘ کا اظہار کرنے پر اتفاق کے بعد ہوا۔ دونوں ممالک کے درمیان یہ معاہدہ طویل مذاکرات کے نتیجے میں سامنے آیا۔ معاہدے کے بعد جاری ہونے والے مشترکہ بیان کے مطابق جنوبی کوریا منگل سے شمالی کوریا کے خلاف پروپیگنڈا نشریات بند کر دے گا جبکہ شمالی کوریا جنوبی کوریا کے خلاف ’ نیم حالتِ جنگ‘ والی کیفیت کو ختم کر دے گا۔ دونوں ممالک نے 53-1950 کے درمیان ہونے والی جنگ کے باعث بچھڑنے والوں خاندانوں کو ملانے کے کام دوبارہ شروع کرنے پر بھی اتفاق کیا۔ واضح رہے کہ دونوں ممالک کے درمیان حال ہی میں کشیدگی اس وقت بڑھ گئی تھی جب جنوبی کوریا نے شمالی کوریا پر الزام لگایا تھا کہ اس نے سرحد پر بارودی سرنگ بچھا رکھی تھی جس سے اس کے دو فوجی زخمی ہو گئے تھے۔ جنوبی کوریا کا مطالبہ تھا کہ شمالی کوریا اس کے لیے معافی مانگے جبکہ شمالی کوریا ان الزامات سے انکار کرتا ہے۔

TOPPOPULARRECENT