Tuesday , December 12 2017
Home / کھیل کی خبریں / عامر خان نے والد اور چچا کو باکسنگ انتظامیہ سے الگ کردیا

عامر خان نے والد اور چچا کو باکسنگ انتظامیہ سے الگ کردیا

نیویارک۔31 جنوری (سیاست ڈاٹ کام) خاندانی مسائل میں گھرے پاکستانی نژاد برطانوی باکسر عامر خان نے اپنا انتظامی عملہ تبدیل کرتے ہوئے والد، چچا اور دیگر رشتے داروں کو باکسنگ کے معاملات سے علیحدہ کردیا۔باکسر عامر خان اس وقت زندگی کے اہم دوراہے پر کھڑے ہیں جہاں بیوی فریال مخدوم کے ان کے اہلخانہ سے شدید تنازعات کے بعد انہیں اپنا گھر بچانے کا چیلنج درپیش ہے اور وہ اب اسی تگ و دو میں مصروف ہیں۔اس اہم مسئلے کے باوجود انہوں ے فوری طور پر والد کو باکسنگ معاملات سے الگ کردیا ہے کیونکہ وہ مستقبل میں نئی ٹیم تشکیل دینا چاہتے ہیں اور اس سلسلے میں چند اہم فیصلے کئے ہیں۔امریکہ میں  ٹریننگ میں مشغول عامرخان کا خیال ہے کہ خاندانی مسائل کی وجہ سے ان کا باکسنگ بزنس متاثر ہو سکتا ہے اور اسی خطرے کے پیش نظر انہوں نے والد سجاد خان، چچا طاہرخان اور دیگر رشتہ داروں کو باکسنگ مینجمنٹ اور چیریٹی معاملات سے الگ کر دیا ہے۔عامر خان کے والد 2004 سے ان کے ساتھ بطور منیجر کام کررہے تھے جبکہ چچا طاہر خان عامر خان فاؤنڈیشن کے معاملات سنبھال رہے تھے۔ عامرخان نے کہا ہے کہ لوگ سمجھتے ہیں کہ اب ان میں دم خم نہیں رہا لیکن وہ اس تاثر کو آئندہ فائٹ میں ختم کر دیں گے۔عامر خان نے کہا کہ وہ اپنے خاندان سے پیار کرتے ہیں لیکن ان کا روزگار باکسنگ ہے جس کے لئے وہ ایک نئی ٹیم بنانے کے خواہشمند ہیں۔انہوں نے کہا کہ والد اور والدہ کی بے حد عزت کرتا ہوں اور تمام رشتے داروں سے تعلقات قائم رکھنا چاہتا ہوں لیکن میرے خیال میں کاروباری معاملات کو الگ رکھا جائے تو بہتر ہے۔عامر نے واضح کیا کہ میں اپنے والدین کو اگلی فائٹ دیکھنے کے لئے ضرور مدعو کروںگا لیکن میں کاروبار اور خاندان کو الجھانا نہیں چاہتا لہٰذا انہیں بزنس سے الگ کرنے کا فیصلہ کیا ہے۔

TOPPOPULARRECENT