Saturday , December 16 2017
Home / شہر کی خبریں / عثمان ساگر اور حمایت ساگر کی سطح آب میں معمولی اضافہ

عثمان ساگر اور حمایت ساگر کی سطح آب میں معمولی اضافہ

حیدرآباد ۔ 7 ۔ اکٹوبر : ( سیاست نیوز ) : شہر میں جاری طوفانی بارش کے سبب دونوں آبی ذخائر عثمان ساگر اور حمایت ساگر کی سطح آب میں معمولی اضافہ ریکارڈ کیا گیا ۔ گذشتہ دنوں سے جاری بارش کے سبب دونوں آبی ذخائر کی سطح آب میں قابل لحاظ اضافہ کی توقع جاری تھی چونکہ شہری علاقوں کے علاوہ نواحی علاقوں میں بارش کے سبب نشیبی علاقے زیر آب ہیں تاہم ان ذخائر آب میں پانی کا قابل لحاظ انداز میں جمع نہ ہونا آب گیر علاقوں پر ناجائز قبضہ تصور کیا جارہا ہے ۔ رضاکار تنظیموں اور ذخائر آب کے تحفظ کے لیے آواز بلند کرنے والے اداروں کے احتجاج کے بعد سرکاری طور پر صرف احکامات جاری کئے گئے جب کہ خاطر خواہ اقدامات نہ ہونے کے سبب ایسی زبردست بارش کا بھی ان ذخائر آب کو کوئی فائدہ نہ ہوسکا ۔ شہر کے یہ تاریخی آبی ذخائر ایک عرصہ دراز تک شہریوں کی آبی ضروریات کو پورا کرنے میں کافی مددگار ثابت ہوئے ۔ تاہم وقت کے ساتھ بدلتی حکومتوں کی مجرمانہ غفلت اور رکاوٹوں کو دور کرنے آب گیر علاقوں کو بحال کرنے میں سیاسی رکاوٹوں نے ان ذخائر آب کو اس انجام تک پہونچا دیا ۔ عثمان ساگر کی سطح آب 1790 فٹ ہے اور اس آبی ذخیرہ میں 3.900 ٹی ایم سی پانی کو محفوظ رکھنے کی صلاحیت پائی جاتی ہے جب کہ حمایت ساگر کی سطح آب 1736.5 ہے ہے اور یہ آبی ذخیرہ 2.967 ٹی ایم سی پانی کا ذخیرہ کرسکتا ہے ۔ تاہم گذشتہ دن کی بہ نسبت دونوں آبی ذخیروں میں فی کس 50 سنٹی میٹر کا اضافہ ریکارڈ کیا گیا ۔ کل تک عثمان ساگر کی آبی سطح 1777.900 فیٹ تھی جو آج 1777.950 ریکارڈ کی گئی ۔ اس طرح حمایت ساگر کی آبی سطح کل 1748.750 فیٹ ریکارڈ کی گئی جو آج 1748.800 تک پہونچی ہے ۔

TOPPOPULARRECENT