Sunday , April 22 2018
Home / شہر کی خبریں / عصر حاضر میں حضرت امیر خسرو کی تعلیمات سے واقف کروانا اہم ضرورت

عصر حاضر میں حضرت امیر خسرو کی تعلیمات سے واقف کروانا اہم ضرورت

آئندہ ماہ جشن خسرو تقاریب ، پروگرام کو قطعیت ، مولانا صوفی شاہ محمد مظفر علی چشتی کی پریس کانفرنس
حیدرآباد ۔ 29 ۔ نومبر : ( سیاست نیوز ) : مجلس چشتیہ کے زیر اہتمام صوفی کرام کی تعلیمات کو بنی نوع انسانی بلا لحاظ مذہب وملت مرد و خواتین کے علاوہ نئی نسل تک پہنچانے کے لیے جشن خسرو کی پانچویں عالمی کانفرنس 3 ، 4 ، 9 ، 10 اور 11 دسمبر کو شہر حیدرآباد منعقد ہوگی ۔ جس کے پروگرام شہر کے مختلف مقامات پر منعقد ہوں گے ۔ یہ بات آج مولانا صوفی شاہ محمد مظفر علی چشتی ابوالعلائی سجادہ نشین و معتمد عمومی مجلس چشتیہ پریس کانفرنس میں بتائی ۔ انہوں نے عالمی جشن خسرو کے اہتمام و انصرام اور اس کے اغراض و مقاصد پر کہا کہ عصر حاضر کے تناظر میں حضرت امیر خسرو کی تعلیمات اور تصانیف کو اجاگر کرنا وقت کی ایک اہم ضرورت بن چکی ہے ۔ اس لیے اس کانفرنس میں اس کے ساتھ اردو ، انگریزی ، ہندی اور تلگو زبانوں میں صوفی ادب کے حامل علماء کی خدمات کا اعتراف کرنا بھی کانفرنس کا مقصد ہے ۔ انہوں نے بتایا کہ حضرت امیر خسرو دہلوی جہاں ایک سپاہی ، صوفی ، درباری شاعری اور موسیقار تھے وہیں ان کا شمار برصغیر کے ثقافتی تاریخ کی اہم شخصیات میں ہوتا ہے ۔ وہ شعر و ادب فنون و لطیفہ کے ماہر تھے اور حضرت سید نظام الدین اولیاءؒ کے خلیفہ ، سلاطین ہند کے دربار سے ان کی وابستگی تھی ۔ حضرت امیر خسرو نے اس دور میں سیکولرازم کی نہ صرف وکالت کی بلکہ سیکولرازم کو عملی جامہ پہنایا ۔ اس کو مد نظر رکھتے ہوئے ان کے پیغام کو عام کرنے کیلئے شہر میں یہ تقاریب نئی نسل کیلئے ایک سنگ میل ثابت ہوگی ۔ بین الاقوامی کانفرنس کی افتتاحی تقریب سالار جنگ میوزیم میں منعقد ہوگی ۔ مہمان خصوصی جناب محمد محمود علی نائب وزیر اعلی تلنگانہ ہوں گے ۔ اعزازی مہمان قونصلیٹ جنرل ایران متعینہ حیدرآباد محمد حق بن اور ڈاکٹر عقیل ہاشمی شرکت کریں گے ۔ اس موقع پر قوالی کا شاندار پروگرام جناب عتیق حسین خاں بندہ نوازی اور ان کے ہمنوا پیش کریں گے ۔ 9 دسمبر اتوار 6 بجے شام بھارتیہ ودیا بھون کنگ کوٹھی ’ رنگ خسرو ‘ صوفی میوزک منعقد ہوگا ۔ جسے عمران صوفی میوزیکل گروپ پیش کرے گا ۔ 4 دسمبر کو ’ تعلیمی مشن ‘ سالار جنگ میوزیم میں 6 بجے شام منعقد ہوگا ۔ اس اجلاس کو جناب احمد اللہ خاں ، ڈاکٹر عقیل ہاشمی ، ڈاکٹر ذوالفقار صدیقی ، پروفیسر حبیب نثار ، ڈاکٹر آمنہ تحسین ( مانو ) ، پروفیسر مجید بیدار اور دوسرے مخاطب کریں گے ۔ 11 دسمبر کو حضرت مولانا سید فضل المتین چشتی گدی نشین کی سرپرستی اور مولانا صوفی شاہ محمد مظفر علی چشتی ابوالعلائی کی نگرانی میں منقبتی ، طرحی مشاعرہ ’ بیان کیجئے فضیلت امیر خسرو ‘ کی منعقد ہوگا ۔ جناب پروفیسر ایس اے شکور ڈائرکٹر اکیڈیمی ، جناب مضطر مجاز اعزازی مہمان ہونگے ۔ ڈاکٹر جاوید کمال خیر مقدم کرینگے ۔ اس پریس کانفرنس میں ڈاکٹر جاوید کمال ، صوفی خرم علی اور دوسرے موجود تھے ۔۔

TOPPOPULARRECENT