Monday , November 20 2017
Home / Top Stories / مسئلہ کشمیر کو حل کرنے ہمہ رخی مذاکرات کی تجویز

مسئلہ کشمیر کو حل کرنے ہمہ رخی مذاکرات کی تجویز

صدر ترکی رجب طیب اردغان کی آمد ،آج وزیراعظم نریندر مودی سے ملاقات
نئی دہلی ۔ /30 اپریل (سیاست ڈاٹ کام )صدر ترکی رجب طیب اردغان نے مسئلہ کشمیر کی یکسوئی کیلئے ہمہ رخی مذاکرات کی تجویز پیش کی تاکہ علاقہ میں امن کی برقراری یقینی ہوسکے ۔ رجب طیب اردغان آج رات نئی دہلی پہونچے ۔ وہ وزیراعظم نریندر مودی سے کل ملاقات کریں گے ۔ انہوں نے نیوکلیر سپلائرس گروپ (این ایس جی) میں ہندوستان اور پاکستان کی رکنیت کی تائید کرتے ہوئے کہا کہ ہندوستان کو اس پر اعتراض نہیں کرنا چاہئیے ۔ انہوں نے ایک نیوز چیانل کو دیئے گئے انٹرویو میں کہا کہ کشمیر میں انسانی ہلاکتوں کا سلسلہ ختم ہونا چاہئیے ۔ ہمہ رخی مذاکرات کے ذریعہ ہم اس مسئلہ کا مستقل حل تلاش کرسکتے ہیں ۔ انہوں نے کہا کہ ہندوستان اور پاکستان دونوں کے مفاد میں یہی ہوگا کہ وہ اس مسئلہ کو حل کریں اور آئندہ نسلوں کو متاثر ہونے نہ دیں ۔ دنیا بھر میں کہیں بھی مذاکرات سے بہتر کوئی اور راستہ نہیں ۔ اگر ہم عالمی امن کیلئے اپنا حصہ ادا کریں گے تو مثبت نتائج بھی برآمد ہوں گے ۔ رجب طیب اردغان نے کہا کہ ہندوستان اور پاکستان دونوں ترکی کے دوست ہیں اور وہ چاہتے ہیں کہ مسئلہ کشمیر کو تمام متعلقہ فریقین مذاکرات کے ذریعہ حل کریں ۔ یہ مسئلہ تقریباً 70 سال سے لیت و لعل کا شکار ہے ۔ ترکی میں کرد مسئلہ کے تعلق سے سوال کا جواب دیتے ہوئے انہوں نے کہا کہ مسئلہ کشمیر سے اس کا موازنہ نہیں کیا جاسکتا ۔ ہمیں کرد عوام سے کوئی مسئلہ درپیش نہیں ہے بلکہ دہشت گرد تنظیم سے مسئلہ درپیش ہے ۔ کرد مسئلہ ایک علاقائی تنازعہ ہے جبکہ جموں و کشمیر کی صورتحال بالکل الگ ہے اور ہمیں ان دونوں میں موازنہ کی غلطی نہیں کرنی چاہئیے ۔

TOPPOPULARRECENT