Monday , December 11 2017
Home / ہندوستان / مسلمانوں نے ناپاک منصوبوں کو ناکام بنایا : نقوی

مسلمانوں نے ناپاک منصوبوں کو ناکام بنایا : نقوی

نئی دہلی۔ 26 ستمبر ۔(سیاست ڈاٹ کام) مرکزی وزیر اقلیتی اُمور مختار عباس نقوی نے آج کہا کہ اسلام کو حفاظتی ڈھال بناکر دہشت گردی کا شیطانی کھیل کھیلنے والے عناصر اسلام اور انسانیت دونوں کے دشمن ہیں۔نقوی نے یہاں شام کے مفتی اعظم ڈاکٹر احمدبد رالدین حسون سے ملاقات میں کہا کہ مسلم کمیونٹی سمیت ہندوستان کے ہر طبقے نے ایسی شیطانی طاقتوں کے منصوبوں کو ناکام کرنے میں اہم کردار ادا کیا ہے ۔ انہوں نے کہا کہ ہندوستان کی ثقافت اورتہذیب امن اور بھائی چارے کے اقدار سے بھرپور ہے ۔ حضرت امام حسینؓ کا کربلا کے میدان میں دہشت گردی اور ظلم کے خلاف دیا گیاپیغام اسلام اور انسانیت کیلئے ہمیشہ بامعنی سبق کے طورپر یاد رکھا جائے گا۔ وزیر موصوف نے کہا کہ اسلام نے ہمیشہ ہی دہشت گردی اور دیگر تمام اقسام کے تشدد کے خلاف پرزور آواز اٹھائی ہے اور انسانیت، بھائی چارے اور ہم آہنگی کا پیغام دیا ہے ۔ دہشت گردی کے خلاف ملک کی پالیسی کا ذکر کرتے ہوئے انہوں نے کہا کہ ہندوستان دہشت گردی کے خلاف ایک عالمی مہم میں اہم کردار ادا کر رہا ہے اور اس کے خلاف ’زیرو ٹالرنیس ‘کی پالیسی کے تحت کام کیا جا رہا ہے ۔

کولگام :خواتین کی چوٹی کاٹنے کے پراسرار واقعات پر ہڑتال
سری نگر۔ 26 ستمبر ۔(سیاست ڈاٹ کام) جنوبی کشمیر کے ضلع کولگام کے مختلف حصوں میں خواتین کی چوٹی کاٹنے کے پراسرار واقعات کے خلاف آج ہڑتال کی گئی۔ ہڑتال کے دوران چند ایک مقامات پر لوگوں نے سڑکوں پر نکل کر احتجاج کیا اور سیول و پولیس انتظامیہ پر قصورواروں کا پتہ لگانے میں ناکام ثابت ہونے کا الزام عائد کیا۔ احتجاجیوں نے اس کے علاوہ فوج پر قصورواروں کو بچانے کا الزام عائد کردیا۔ ایک رپورٹ کے مطابق ضلع کولگام میں رواں ماہ کے دوران خواتین کی چوٹی کاٹنے کے ایک درجن واقعات پیش آئے ہیں۔ ان پراسرار واقعات کے خلاف ضلع کے مختلف حصوں میں آج بطور احتجاج دکانیں اور تجارتی مراکز بند رہے جبکہ سڑکوں پر گاڑیوں کی آمدورفت جزوی طور پر معطل رہی۔ ضلع کے موضع مالون کے رہائشیوں کا کہنا ہے کہ انہوں نے گذشتہ رات خواتین کی چوٹی کاٹنے والے دو افراد کو دبوچ لیا تھا، لیکن نزدیکی فوجی کیمپ سے فوجی اہلکاروں نے وہاں پہنچ کر انہیں اپنی تحویل میں لینے کے بعد رہا کردیا۔

TOPPOPULARRECENT