Tuesday , November 20 2018
Home / Top Stories / مودی کی کتاب ’’ ایگزام واریئرس‘‘ کا اردو ترجمہ جاری

مودی کی کتاب ’’ ایگزام واریئرس‘‘ کا اردو ترجمہ جاری

اردو چربہ شائع نہ ہوتا تو مقصد ہی مکمل نہ ہوتا : جیتندر سنگھ
نئی دہلی ۔ 15 ستمبر (سیاست ڈاٹ کام) وزیراعظم نریندر مودی کی کتاب ’ ایگزام واریئرس‘ کا اردو ترجمہ آج یہاں متعدد وزراء کی موجودگی میں جاری کردیا گیا ۔ یہ کتاب قبل ازیں 14 زبانوں میں شائع کی گئی تھی جس میں امتحانی تیاریوں کی راہ میں حائل دشواریوں اور ذہنی الجھن سے مقابلہ کرنے کیلئے طلبہ اور اولیائے طلبہ کو 25 ترکیبیں بتائی گئی تھیں ۔ وزیراعظم کے دفتر ( پی ایم او) میں مملکتی وزیر جیتندر سنگھ نے انڈیا اسلامک کلچرل سنٹر کے زیراہتمام ڈاکٹر امبیڈکر انٹرنیشنل سنٹر میں منعقدہ تقریب کے دوران انتہائی شستہ و شائستہ اردو میں خطاب کرتے ہوئے کہا کہ ’ اس کتاب کو وزیراعظم کے سواء اور کوئی نہیں لکھ سکتا اور اگر اردو زبان میں ترجمہ شائع نہیں کیا جاتا تو اس (کتاب) کا مقصد بدستور نامکمل رہتا ۔ یہ اس لئے بھی ہے کیونکہ ہندوستان کی یہ فطری زبان کئی اعتبار سے ہندوستانی ہی ہے اور یہ اردو زبان ہی ہے جس میں ہندوستان کو گنگاجمنی تہذیب کا اثر ملتا ہے ۔ یہ کسی دوسری زبان میں نہیں دیکھا جاسکتا ‘‘ ۔ وزیر فروع انسانی وسائل پرکاش جاؤڈیکر ، وزیر اقلیتی امور ، مختار عباس نقوی ، اداکار رشی کپور ، انوکپور ، ہدایت کار و فلمساز مظفر علی بھی اس موقع پر موجود تھے ۔ نقوی نے کہا کہ ’’ شرکاء میں ایسے لوگ بھی ہیں جو اردو کو ایک زبان اور اس کی شائستگی دونوں ہی اعتبار سے پسند کرتے ہیں ۔ یہ کتاب جو مودی جی ہندی اور اردو میں تحریر کئے ہیں اب یہ عربی زبان میں بھی شائع کی جائے گی اور میں اس اقدام کا خیرمقدم کرتا ہوں ۔

TOPPOPULARRECENT