Friday , February 23 2018
Home / شہر کی خبریں / نواب شاہ عالم خاں مرحوم کے نام پر روز گارڈن

نواب شاہ عالم خاں مرحوم کے نام پر روز گارڈن

چیف منسٹر کا مرحوم کے پسماندگان سے ملاقات اور اظہار تعزیت
حیدرآباد ۔ 31۔ اکتوبر (سیاست نیوز) چیف منسٹرکے چندر شیکھر راؤ نے شہر کے کسی مرکزی مقام پر نواب شاہ عالم خاں مرحوم کے نام سے روز گارڈن کے قیام کا اعلان کیا ۔ چیف منسٹر نے آج جناب محبوب عالم خاں کی قیامگاہ پہنچ کر افراد خاندان سے ملاقات کی اور نواب شاہ عالم خاں کے انتقال پر پرسہ دیا۔ چیف منسٹر نے نواب صاحب کی شہر حیدرآباد کے لئے دیرینہ خدمات اور خاص طور پر علم و ادب اور تعلیم کے شعبہ میں گراں قدر خدمات کا اعتراف کیا۔ انہوں نے کہا کہ شاہ عالم خاں حیدرآباد کی ایک وضعدار شخصیت تھے جنہیں دیکھتے ہی حیدرآبادی تہذیب کی یاد تازہ ہوجاتی۔ چیف منسٹر نے روز سوسائٹی کے ذریعہ ہر سال حیدرآباد میں گلابوں کی نمائش کے اہتمام میں نواب شاہ عالم کے خاں کے رول کا ذکر کیا اور کہا کہ حیدرآباد کے کسی مرکزی مقام پر روز گارڈن قائم کرتے ہوئے اسے نواب شاہ عالم خاں کے نام سے موسوم کیا جائے گا۔ نواب شاہ عالم خاں آل انڈیا روز فیڈریشن کے صدرنشین بھی رہے۔ چیف منسٹر نے عثمانیہ یونیورسٹی کی عظمت اور وقار کی بحالی کے اقدامات کا ذکر کیا اور کہا کہ متحدہ آندھرا میں یونیورسٹی کو نظرانداز کیا گیا ۔ انہوں نے یونیورسٹی کا سابقہ نام جامعہ عثمانیہ بحال کرنے کا تیقن دیا۔ چیف منسٹر نے تلنگانہ تحریک کے دوران 12 برس تک جناب محبوب عالم خاں کی تائید اور تعاون کا ذکر کیا۔ اس موقع پر جناب قادر عالم خاں ، احمد عالم خاں ، محمد عالم خاں، مصطفیٰ عالم خاں اور دوسرے موجود تھے۔ چیف منسٹر کے ہمراہ میئر حیدرآباد اور ڈپٹی میئر بھی موجود تھے۔ انہوں نے عہدیداروں کو ہدایت دی کہ روز گارڈن کیلئے مناسب جگہ کا انتخاب کریں ۔

Top Stories

مولانا آزاد کی برسی پر تقریب کا انعقاد دہلی ومرکزی حکومت کی جانب سے بڑے لیڈران نے شرکت نہیں کی‘ صدر جمہوریہ ہند کی جانب سے ان کی مزار پر گل پوشی اور نائب صدر جمہوریہ نے اپنا پیغام بھیجا نئی دہلی۔آزادہندو ستا ن کے پہلے وزیر اتعلیم مولانا آزاد کے ساٹھ ویں یوم وفات کے موقع پر آج ان کے مزار واقع مینابازار میں ایک تقریب کا انعقاد ائی سی سی آر کی جانب سے کیاگیا۔افسوس کی بات یہ رہی کہ اس مرتبہ بھی مولانا آزاد کی وفات کے موقع پر دہلی ومرکزی حکومت کی جانب سے کسی بڑے لیڈران نے شرکت نہیں کی۔ چونکہ جامع مسجد پر کناڈہ کے وزیراعظم کو آناتھا اس لئے تقریب کو بہت مختصر کردیا گیاتھا۔ اس دوران صدرجمہوریہ ہند کی جانب سے ان کی مزار پر گل پوشی کی گئی او رنائب صدر جمہوریہ ہند نے اپنا پیغام بھیجا۔ ائی سی سی آر کے ڈائریکٹر نے مولانا آزاد کو خراج عقیدت پیش کرتے ہوئے کہاکہ جہاں تک مولانا آزاد کا تعلق ہے اور انہوں نے جو خدمات انجام دیں انہیں فراموش نہیں کیاجاسکتا۔ ہندو مسلم میں اتحاد قائم کیااس کی مثال ملنا مشکل ہے انہوں نے بھائی چارہ کوفروغ دیا۔ انٹر فیتھ ہارمنی فاونڈیشن آف انڈیاکے چیرمن خواجہ افتخار احمد نے کہاکہ مولانا آزاد نے لڑکیوں کی تعلیم پر بہت زیادہ توجہ دی۔ جب حکومت قائم ہونے کے بعد قلمدان کی تقسیم ہونے لگے تو مولانا آزاد نے تعلیم کا قلمدان لیاتاکہ لڑکیو ں کی تعلیم پر خاص دھیان دیاجاسکے۔ خاص طور سے مسلم لڑکیو ں کی تعلیم پر زیادہ دھیان دیاجائے۔کیونکہ مسلم لڑکیو ں کو پڑھنے کے زیادہ مواقع نہیں مل پاتے ۔ معروف سماجی کارکن فیروز بخت احمد مولانا سے منسوب ایک پروگرام میں پونے گئے ہوئے تھے۔ انہوں نے نمائندہ کو فون پر بتایا کہ مولانا آزاد کی تعلیمات کو قوم نے بھلادیا ہے۔ آج تک ان جیسا لیڈر پیدا نہیں ہوسکا اور افسوس کی بات ہے کہ مولانا آزاد کی برسی یا یوم پیدائش کے موقع پر دہلی یامرکزی حکومت کی جانب سے کوئی بڑا لیڈر شریک نہیں ہوتا۔ ایسا معلوم ہوتا کہ حکومت نے مولانا آزاد کو بھلادیا ہے۔ اس دوران سی سی ائی آر کی ایک کمار مولانا ابولکلام آزاد فاونڈیشن کے چیرمن عمران خان سمیت کافی لوگ موجود تھے۔
TOPPOPULARRECENT