وشنووردھن ریڈی کو بھاری اکثریت سے کامیاب بنانے اظہر الدین کی اپیل

جوبلی ہلز میں کانگریسی امیدوار کو عوام کی زبردست تائید،عوام کی خدمت میں کوئی کسر باقی نہ رکھنے کا اعلان

حیدرآباد ۔ 30 ۔ نومبر : ( سیاست نیوز) : حلقہ اسمبلی جوبلی ہلز کے کانگریسی امیدوار وشنو وردھن ریڈی کو عوام کے تمام طبقات کی تائید و حمایت حاصل ہے ۔ وشنو اپنے حلقہ کے تمام علاقوں پر توجہ مرکوز کئے ہوئے ہے ۔ انہوں نے آج جوبلی ہلز کے مختلف علاقوں کا دورہ کرتے ہوئے عوام سے ملاقات کی ۔ اس موقع پر عوام نے ان کے آنجہانی والد پی جناردھن ریڈی کی عوامی خدمات کی یادیں تازہ کیں ۔ جس پر وشنو وردھن ریڈی نے انہیں تیقن دیا کہ وہ اپنے والد کے نقش قدم پر چلتے ہوئے عوام کی خدمت کریں گے ۔ اور فرقہ پرستوں کو ابھرنے کا کوئی موقع نہیں دیں گے ۔ یہاں اس بات کا تذکرہ ضروری ہوگا کہ وشنو وردھن ریڈی نے دعویٰ کیا ہے کہ انہیں عوام کے تمام طبقات کی تائید حاصل ہے ۔ انہوں نے ہمیشہ بلا لحاظ مذہب و ملت عوام کی خدمت کی ہے خاص کر اقلیتوں کی بہبود پر توجہ دی ہے ۔ اپنے انتخاب کے بعد وہ اپنے حلقہ کی مسلم آبادی کے لیے متعدد بہبودی اقدامات کریں گے اور اپنے کچھ منصوبوں پر عمل آوری کو یقینی بنائیں گے ۔ عوام کی موثر نمائندگی کریں گے ۔ ان کا حلقہ اسمبلی جوبلی ہلز تلنگانہ کے تمام حلقوں میں مثالی حلقہ ہوگا ۔ وشنو وردھن ریڈی کے مطابق عوام ہی ان کی طاقت ہے ۔ عوام ان کے ساتھ ہیں اور عوام ہی انہیں کامیاب بنائیں گے ۔ وشنو وردھن ریڈی نے مزید بتایا کہ انہوں نے آج رحمت نگر ، ایس پی آر ہلز ، راجیو گاندھی نگر ، ہنومان ٹمپل ، آروگیہ نگر ، نندو نگر ، شیو گنگا نگر ، ٹی انجیا نگر فیس 2 ، سلیم بابا نگر ، سری رام نگر اور دوسری بستیوں کا تفصیلی دورہ کیا ۔ جہاں عوام نے ان کا والہانہ استقبال کرتے ہوئے انہیں کامیاب بنانے کا تیقن دیا ہے ۔ اس موقع پر ان کے ہمراہ سابق کارپوریٹر چندراماں بھی تھے ۔ وشنو وردھن ریڈی نے یہ بھی کہا کہ وہ اپنے حلقہ کے عوام کے مسائل کی یکسوئی اور ان کی مدد کے لیے ہمیشہ تیار رہتے ہیں ۔ وشنو وردھن ریڈی کے بارے میں یہ بھی اطلاعات ہیں کہ انہیں مسلم رائے دہندوں کی بھر پور تائید و حمایت حاصل ہے ۔ ان کے دل میں اپنے ان رائے دہندوں کے لیے خصوصی مقام ہے وہ اپنے والد کی ہی طرح عوام کی خدمت بجالائیں گے ۔ ان کے حلقہ میں اسکولوں ، پارکس اور پرائمری ہیلت سنٹرس کا ایک جال ہوگا ۔ دوسری جانب ہندوستانی کرکٹ ٹیم کے سابق کپتان محمد اظہر الدین نے آج وشنو وردھن ریڈی کی انتخابی مہم میں حصہ لیا ۔ اور عوام سے وشنو جیسے حرکیاتی نوجوان کو منتخب کرنے کی اپیل کی ان کا کہنا تھا کہ جوبلی ہلز میں وشنو کو تمام امیدواروں پر سبقت حاصل ہے ۔۔

TOPPOPULARRECENT