Saturday , April 21 2018
Home / کھیل کی خبریں / ویسٹ انڈیز کے کھلاڑیوں نے ورلڈکپ پر لیگز کو ترجیح دی

ویسٹ انڈیز کے کھلاڑیوں نے ورلڈکپ پر لیگز کو ترجیح دی

جمائیکا ۔26 جنوری (سیاست ڈاٹ کا م )ویسٹ انڈیز کرکٹ بورڈ نے 2019 ورلڈ کپ کے کوالیفائر کیلئے اپنی ٹیم کا اعلان کردیا ہے اور ٹیم کے اسٹار کھلاڑیوں نے اپنے ملک کی نمائندگی کے بجائے پاکستان سوپر لیگ(پی ایس ایل) میں کھیلنے کو ترجیح دی ہے۔گزشتہ چار سال میں ناقص کارکردگی کے سبب ویسٹ انڈیز کی ٹیم کو تاریخ میں پہلی مرتبہ ورلڈ کپ کوالیفائر کھیلنے کی خفت کا سامنا کرنا پڑا جہاں وہ چار تا 25 مارچ دس ملکی ورلڈ کوالیفائرز میں شرکت کرے گی۔ویسٹ انڈیز کے چیئرمین آف سلیکٹرز کورٹنی براؤن نے کوالیفائرز کیلئے اسکواڈ کا اعلان کردیا ہے جس کی قیادت جیسن ہولڈر کریں گے جبکہ دیگر کھلاڑیوں میں جیسن محمد، دویندرا بشو، کارلوس بریتھ ویٹ، شیلڈن کوٹریل، کرس گیل، شیمرون ہٹمیئر، شے ہوپ، ایون لوئس، نکیتا ملر، ایشلے نرس، روومین پاول، کیماروچ، مارلن سیمیولز اور کیسرک ولیمز۔چیف سلیکٹر نے کہا کہ ہم نے چند نامور کھلاڑیوں سے کوالیفائرز کھیلنے کیلئے رابطہ کیا اور ہم کرس گیل اور مارلن سیمیولز کے شکر گزار ہیں جنہوں نے ہماری درخواست کو قبول کر لیا۔تاہم کیرون پولارڈ، سنیل نارائن، ڈیرن براوو اور آندرے رسل نے ویسٹ انڈیز بورڈ کی پیشکش کو یہ کہہ کر مسترد کردیا کہ ان کی ترجیح پاکستان سوپر لیگ کھیلنا ہے۔بورڈ نے ڈیوین براوو سے رابطہ نہیں کیا کیونکہ وہ پہلے ہی کہہ چکے تھے کہ اب وہ ویسٹ انڈیز کیلئے کرکٹ کھیلنے کیلئے دستیاب نہیں ہیں۔واضح رہے کہ ویسٹ انڈیزکھلاڑیوں اور بورڈ کے درمیان ایک عرصے سے مالی تنازعہ چل رہا ہے اور دونوں ہی جانب سے سرد مہری کے سبب یہ معاملہ طول پکڑتا جا رہا ہے اور بورڈ نے سینئر کھلاڑیوں کے سخت رویے کے سبب انہیں سینٹرل کنٹریکٹ دینے سے بھی انکار کردیا تھا۔

TOPPOPULARRECENT