Monday , December 18 2017
Home / شہر کی خبریں / کانگریس دور کے 30 ہزار مکانات کی تقسیم کا مطالبہ

کانگریس دور کے 30 ہزار مکانات کی تقسیم کا مطالبہ

پارٹی کی حکومت میں 50 ہزار مکانات مستحقین کو الاٹ کردئیے گئے
حیدرآباد ۔ یکم ۔ مارچ : ( سیاست نیوز ) : تلنگانہ پردیش کانگریس کمیٹی نے کانگریس کے دور حکومت میں تعمیر کردہ 30 ہزار مکانات کو فوری استفادہ کنندگان میں تقسیم کرنے کا تلنگانہ حکومت سے مطالبہ کیا ۔ آج گاندھی بھون میں پریس کانفرنس سے خطاب کرتے ہوئے سابق ریاستی وزیر داخلہ مسز سبیتا اندرا ریڈی نے یہ بات بتائی ۔ اس موقع پر سابق ارکان اسمبلی مسٹر ڈی سدھیر ریڈی ، مسٹر کے سری سلم گوڑ کے علاوہ دوسرے موجود تھے ۔ مسز سبیتا اندرا ریڈی نے کہا کہ کانگریس کے دور حکومت میں 80 ہزار مکانات تعمیر کرنے کا منصوبہ تیار کیا گیا جس پر 1742 کروڑ روپئے خرچ کئے گئے ۔ اپنے دور میں کانگریس نے 50 ہزار مکانات غریبوں میں تقسیم کردئیے ۔ مزید 30 ہزار مکانات تعمیر ہوچکے ہیں تاہم ٹی آر ایس حکومت ان مکانات کو استفادہ کنندگان میں تقسیم کرنے کے معاملے میں ٹال مٹول کا مظاہرہ کررہی ہے ۔ جس سے مکانات کو نہ صرف نقصان پہونچ رہا ہے بلکہ استفادہ کنندگان میں تشویش کی لہر پائی جاتی ہے ۔ کانگریس حکومت کے ایک بیڈروم مکانات کی پالیسی سے متاثر ہو کر ٹی آر ایس نے ڈبل بیڈ روم مکانات اسکیم کا آغاز کیا ہے ۔ گریٹر حیدرآباد کے حدود میں ایک لاکھ ڈبل بیڈ روم مکانات تعمیر کرنے کا چیف منسٹر تلنگانہ نے اعلان کیا ہے ۔ تاہم صرف ضلع رنگاریڈی میں ابھی تک 1.17 لاکھ ڈبل بیڈ روم کی درخواستیں وصول ہوئی ہیں ۔ حکومت عوام میں پہلے امید جگا رہی ہے پھر ان پر پانی پھیر رہی ہے ۔ وہ حکومت سے مطالبہ کرتی ہیں کہ فوری کانگریس کے دور حکومت میں تعمیر شدہ 30 ہزار مکانات غریبوں میں تقسیم کردے ۔ سارے تلنگانہ میں ڈبل بیڈ روم مکانات کے تعلق سے حکومت غریب عوام کو جو خواب دکھا رہی ہے ۔ اس کی عمل آوری کے لیے حکومت کی جانب سے سنجیدہ کوشش کا فقدان ہے ۔ حکومت کے پاس اراضی نہیں ہے ۔ خریدنے کے لیے بھی بجٹ میں گنجائش فراہم نہیں کی جارہی ہے ۔ انتخابات میں کامیابی حاصل کرنے کے لیے حکومت کبھی پورے نہ ہونے والے جھوٹے وعدے کررہی ہے ۔ انتخابات کے بعد اس کو فراموش کردیا جارہا ہے ۔ ٹی آر ایس کے انتخابی منشور میں کئے گئے ایک بھی وعدے کو ابھی تک پورا نہیں کیا گیا جس کی کانگریس پارٹی سخت مذمت کرتی ہے ۔۔

TOPPOPULARRECENT