حیدرآباد۔9مارچ (یواین آئی ) کھمم کے قبائلی علاقے چرلہ منڈل میں ایک عجیب شادی ہوئی جس میں دلہے نے ایک ہی منڈپ میں دو لڑکیوں سے شادی کرلی۔ ان تینوں کی شادی کے کارڈس بھی تقسیم کئے گئے جو اب سوشل میڈیا پر وائرل ہیں۔ بتایا گیا کہ چرلہ منڈل کے ستی بابو نے ڈگری تک تعلیم حاصل کی۔ انٹر کی تعلیم کے دوران اسے سوپنا کماری سے محبت ہوگئی تھی۔ اسی دوران ستی بابو نے کرناپلی کی سنیتا کو بھی پسند کیا جو رشتہ میں اس کی ماموں زاد ہوتی تھی۔ اس کے بعد وہ تین سال تک دونوں کے ساتھ رہا جس کے بعد سوپنا کے ہاں ایک لڑکی اور اب سنیتا کو لڑکا پیدا ہوا۔ لڑکیوں کے والدین نے جب اسے شادی کیلئے کہا تو اس نے فریقین کو باور کرایا کہ وہ ان دونوں سے محبت کرتا ہے ۔ تینوں نے پنچایت کے ذریعہ ایک ساتھ شادی کا وعدہ کیا اور وعدہ کے مطابق ان کی شادی بغیر پنڈت کے انجام دی گئی۔بتایا جاتا ہے کہ چند قبائلی خاندانوں میں شادی سے پہلے ساتھ میں زندگی گزارنے کا رواج ہے ۔
