رانچی۔11؍اکتوبر( ایجنسیز ) جھارکھنڈ میں نکسلائٹس نے کل دیر رات مغربی سنگھ بھوم ضلع کے سرنڈا جنگل میں دو مختلف مقامات پر آئی ای ڈی دھماکے کر کے سیکورٹی فورسز کو نشانہ بنایا۔ اس حملے میں سی آر پی ایف کے ہیڈ کانسٹیبل مہندر لشکر شہید ہو گئے جبکہ دو جوان انسپکٹر کوشل کمار مشرا اور سب انسپکٹر رام چندر گوگی زخمی ہوئے۔ یہ حملہ نکسلیوں کی طرف سے منائے جانے والے ’ہفتہ مزاحمت‘ کے دوران ہوا جس سے پورے علاقے میں دہشت کا ماحول پیدا ہو گیا۔خبروں کے مطابق ضلع پولیس، سی آر پی ایف کی 60 ویں بٹالین اور دیگر سیکورٹی فورسز ایک مشترکہ نکسل مخالف آپریشن کر رہے تھے کہ نکسلیوں نے گھات لگا کر حملہ کردیا۔
شہید مہندر لشکر آسام کے ناگون ضلع کے رہنے والے تھے۔ ان نعش کو رانچی لایا جا رہا ہے، جہاں سی آر پی ایف کیمپ میں پورے سرکاری اعزاز کے ساتھ ان کی آخری رسومات انجام دی جائیں گی۔
پولیس سپرنٹنڈنٹ امت رینو نے بتایا کہ واقعہ کے فوراً بعد علاقے میں تلاشی مہم تیز کر دی گئی ہے اور نکسلیوں کی تلاش جاری ہے۔ ایک اور حملے میں نکسلیوں نے ایک پل کو بھی دھماکے سے اڑا دیا جس سے مقامی آمد و رفت بند ہوگئی ہے۔نکسلیوں کی طرف سے یہ حملہ 8 سے 15 اکتوبر تک منائے جا رہے ’ہفتہ مزاحمت‘ کے درمیان ہوا ہے۔سیکورٹی ایجنسیوں کو خدشہ ہے کہ نکسلی علاقے میں کسی بڑے حملے کی منصوبہ بندی کر رہے ہیں۔ حال ہی میں کئی نکسلیوں نے ڈی جی پی انوراگ گپتا کے سامنے خود سپردگی کی تھی لیکن اس حملے سے ظاہر ہوتا ہے کہ تنظیم اب بھی سرگرم ہے اور انتقامی سرگرمیوں میں مصروف ہے۔
