نئی دہلی: جنگ سے متاثرہ یوکرین سے ہندوستانی شہریوں کی واطن واپسی کا سلسلہ جاری ہے۔ دوسری پرواز 250 ہندوستانی شہریوں کو لیکر اتوار کی صبح نئی دہلی پہنچی۔ وزیرخارجہ ایس جے شنکر نے ٹوئیٹ کیاکہ آپریشن گنگا کے تحت 240 ہندوستانی شہریوں کے ساتھ تیسری پرواز بڈاپسٹ سے دہلی کیلئے روانہ ہوئی ہے۔ انہوں نے مزید کہا کہ وہ جنگ زدہ یوکرین سے ہندوستانی شہریوں کے انخلاء کی ذاتی طور پر نگرانی کررہے ہیں۔دریں اثنا، ایئر انڈیا1942 کی پرواز رومانیہ کے دارالحکومت بخاریسٹ سے 250 ہندوستانی شہریوں کو لیکر تقریباً 3:00 بجے دہلی ہوائی اڈہ پر اتری۔ شہری ہوا بازی کے وزیر جیوتی رادتیہ سندھیا اور وزیرمملکت برائے امور خارجہ وی مرلی دھرن نے یوکرین سے واپس آنے والے ہر ہندوستانی کو گلاب کے پھول پیش کرکے مبارکباد دی اور کہاکہ گھر واپسی مبارک ہو۔ انہوں نے کہا کہ 250 ہندوستانیوں کو بحفاظت واپس لوٹتے ہوئے دیکھ کر راحت اور خوشی ہوئی۔ ان کا استقبال کیا گیا اور میرے ساتھی وی مرلیدھرن کے ساتھ بات چیت کی۔اپنے ٹویٹ میں مرلیدھرن نے کہا کہ ہم اپنی کوششیں جاری رکھیں گے جب تک کہ ہم آخری ہندوستانی کو یوکرین سے نہیں نکال لیتے۔ انہوں نے ہوائی اڈہ پر طلباء کے ساتھ ملیالم میں بات چیت کی۔اس سے پہلے ہفتہ کی شام 219ہندوستانیوں کو لیکر پہلی پرواز ممبئی پہنچی۔
وزیر تجارت پیوش گوئل ان کے استقبال کے لیے ممبئی ہوائی اڈے پر موجود تھے ۔