گوہاٹی: وزیر اعظم نریندر مودی نے منگل کو کہا کہ آسام 2030تک 150 بلین امریکی ڈالر کی معیشت بننے کی راہ پر گامزن ہے اور ایڈوانٹیج آسام ریاست کی صلاحیت اور ترقی کو دنیا کے ساتھ جوڑنے کی ایک بڑی پہل ہے ۔مودی نے یہاں ایڈوانٹیج آسام کے دوسرے ایڈیشن کا افتتاح کرتے ہوئے کہا کہ آج مشرقی ہندوستان اور شمال مشرقی ہندوستان مستقبل کے ایک نئے سفر پر گامزن ہیں اور ملک کی ترقی میں آسام کا تعاون مسلسل بڑھ رہا ہے ۔ انہوں نے کہا کہ ایڈوانٹیج آسام سمٹ کا پہلا ایڈیشن 2018 میں منعقد ہوا تھا اور اس وقت ریاست کی معیشت کی قیمت 2.75 لاکھ کروڑ روپے تھی۔انہوں نے کہا کہ آج آسام تقریباً 6 لاکھ کروڑ روپے کی معیشت والی ریاست بن چکی ہے اور موجودہ حکومت کے تحت ریاست کی معیشت صرف چھ سالوں میں دوگنی ہو گئی ہے ۔ انہوں نے زور دے کر کہا کہ آج کا ہندوستان اس صدی کے اگلے 25 سالوں کے لیے ایک طویل مدتی وژن کے ساتھ کام کر رہا ہے ۔انہوں نے کہا کہ دنیا کو ہندوستان کی نوجوان آبادی پر بہت اعتماد ہے ، جو تیزی سے ہنر مند اور اختراعی ہوتی جارہی ہے ۔ انہوں نے ملک کے نو متوسط طبقے میں بڑھتے ہوئے اعتماد کو بھی نوٹ کیا، جو نئی امنگوں کے ساتھ غربت سے نکل رہا ہے ۔
