دبئی ۔انٹرنیشنل کرکٹ کونسل (آئی سی سی) نے پلیئر آف دی منتھ کی نامزدگیوں کا اعلان کردیا۔آئی سی سی نے ورلڈکپ میں اعلیٰ کارکردگی دکھانے والے پاکستان کے آصف علی کو بھی پلیئر آف دی منتھ کے لیے نامزد کیا۔آئی سی سی نے آصف علی کے ساتھ بنگلہ دیش کے شکیب الحسن اور نمیبیا کے ڈیوڈ ویسا بھی نامزد کیے۔آئی سی سی پلیئر آف دی منتھ کی نامزدگیاں اکتوبر کی کارکردگی پر ہوئیں۔آئی سی سی میں پلیئر آف دی منتھ کا فیصلہ عوامی رائے دہی کے ذریعے ہوگا۔شائقین کرکٹ اپنے پسندیدہ کھلاڑی کو ووٹ دے سکتے ہیں، شائقین کرکٹ کے ووٹس کو دیکھتے ہوئے پینل پولنگ کے نتائج کا اعلان کرے گا۔خیال رہے کہ آئی سی سی نے 2021 کے شروع میں کھلاڑیوں کی بہترین کارکردگی کے پیش نظر نئے ایوارڈ متعارف کروائے ہیں جن میں پلیئر آف دی منتھ کا ایوارڈ بھی شامل تھا، یہ ایوارڈ مرد اور خواتین کرکٹرزکو دیا جاتا ہے۔اس سے قبل پاکستانی کرکٹ ٹیم کے کپتان بابر اعظم پلیئر آف دی منتھ کا ایوارڈ حاصل کرچکے ہیں۔یاد رہے کہ اس وقت آصف علی کی بیٹنگ اور خاص کر چھکے مارنے کی صلاحیت کی ہرجگہ دھوم ہے ۔
انگلش بولر ملس ورلڈکپ سے باہر
دبئی۔ انگلینڈ کے فاسٹ بولر ٹائمل ملس ٹی20 ورلڈ کپ کے بقیہ میچوں سے باہر ہوگئے ہیں۔ ملس کی دائی ران میں کھنچاؤ آگیا تھا اور اب انہیں ایونٹ سے باہر ہونا پڑرہا ہے ۔ ان کی جگہ اب ریس ٹوپلے کو ٹیم میں شامل کیا گیا ہے ۔ ٹوپلے اس وقت انگلش ٹیم کے ساتھ متحدہ عرب امارات میں ہی ہیں کیونکہ وہ بطور محفوظ کھلاڑی ٹیم کے ساتھ تھے لیکن اب ٹوپلے اہم ٹیم کا حصہ ہیں۔یادرہے کہ انگلینڈ گروپ 1 سے سیمی فائنل میں پہنچ چکا ہے۔