حیدرآباد ۔ 19 ۔ نومبر : ( سیاست نیوز) : آندھرا پردیش پولیس نے پانچ اضلاع میں 50 سی پی آئی ماویسٹ کیڈروں کو ایک مربوط انٹلی جنس کی زیر قیادت کاررائیوں میں گرفتار کرلیا ۔ 18 نومبر کو الوری سیتارام راجو ضلع کے مریڈوپلی میں ایک انکاونٹر میں نکسلائٹ کمانڈر ہڈما اور پانچ دیگر مارے گئے تھے ۔ ایڈیشنل ڈی جی پی انٹلی جنس مہیش چندرا لڈھا نے وجئے وارہ میں ایک کانفرنس سے خطاب کرتے ہوئے کہا کہ ہڈما کی ہلاکت کے بعد ہم نے پانچ اضلاع میں انٹلی جنس پر مبنی ایک مربوط آپریشن شروع کیا اور 50 سی پی آئی ماویسٹ کیڈرس کو گرفتار کرلیا ۔ گرفتار ماؤنوازوں کا تعلق خصوصی زونل کمیٹی ممبران ، ڈیویژنل کمیٹی ممبران ، ایریا کمیٹی ممبران اور جنوبی بستر ، ڈنڈا کرنیا علاقے میں کام کرنے والے باقاعدہ پارٹی ممبران ہیں ۔ ایڈیشنل ڈی جی پی انٹلی جنس نے بتایا کہ حالیہ برسوں میں کی گئی سب سے وسیع کارروائیوں میں سے ایک ہے ۔ جس کے نتیجے میں متعدد اضلاع سے 50 ماؤنوازوں کو گرفتار کیا گیا ہے ۔ انہوں نے بتایا کہ یہ آپریشن کرشنا ، ایلورو ، این ٹی آر ، کاکیناڈا اور کونیما اضلاع بشمول وجئے واڑہ شہر میں کیا گیا ۔ انہوں نے کہا کہ چھتیس گڑھ کے سکما ، بیجاپور ، نارائن پور اور مغربی بستر اضلاع سے کئی کیڈر مسلسل سیکوریٹی دباؤ کی وجہ سے بھاگ گئے اور انہیں آندھرا پردیش میں گرفتار کیا گیا ۔ پولیس نے تلاشی کے دوران مختلف مقامات سے 39 ہتھیار ، گولہ بارود کے 302 راؤنڈ ، ڈیٹونیٹر ، کارڈٹیکس وائر ، مواصلاتی آلات اور 13 لاکھ نقد رقم برآمد کی ۔ ہڈما کی ہلاکت اور ان کی گرفتاری اہم قیادت کے خاتمے کی نشاندہی کرتے ہیں ۔ کسی شہری کو نقصان پہنچائے بغیر ان کی گرفتاری خاموش انداز میں کی گئی ۔۔ ش
