کے ٹی آر کے ٹوئیٹ پر اسپیشل چیف سکریٹری اروند کمار کا مثبت رد عمل ۔ تیاریوں کا آغاز
حیدرآباد۔11جولائی (سیاست نیوز) ریاست کی مختلف بلدیات میں سڑکوں کی حالت و سڑکوں کی تعمیر کے ذمہ دار عہدیدار کے علاوہ سڑک تعمیر کرنے والے کنٹراکٹرس کی تفصیلات پر مبنی ویب سائٹ اندرون 6ہفتہ تیار کر لی جائیگی۔ اسپیشل چیف سیکریٹری اروند کمار نے کل وزیر بلدی نظم و نسق کی جانب سے سڑکوں کے متعلق QR کوڈ کی تیاری اور بنگلورو کے طرز پر تمام تفصیلات کے اندراج کو یقینی بنانے ٹوئیٹ کا جواب دیتے ہوئے کہا کہ محکمہ بلدی نظم ونسق سے ممکنہ حد تک اندرون 4 تا 6 ہفتہ اس منصوبہ کو عملی جامہ پہنایا جائے گا۔ کے ٹی آر نے ٹوئیٹ کے ذریعہ محکمہ بلدی نظم و نسق عہدیدارو ںاور مئیر حیدرآباد مسز وجیہ لکشمی کے علاوہ مسٹر اروند کمار سے بنگلورو کی طرز پر QR کوڈ کی تیاری کے سلسلہ میں استفسار کیا اور کہا تھا کہ اس طرح کا نظام شہر حیدرآباد اور مختلف بلدیات میں بھی لایا جاسکتا ہے جس پر اروند کمار نے کہا کہ اس نظام پر محکمہ بلدی نظم ونسق سے کام کیا جا رہاہے اور اندرون 6ہفتہ اس کو مکمل کرکے تمام تفصیلات پر مشتمل ویب سائٹ اور ایپ جاری کردیا جائیگا۔ بنگلور میں سڑکوں پر موجود QRکوڈ کو اسکان کرکے راہگیر سڑکوں کی تفصیلات بشمول ان کی تعمیرات پر اخراجات ‘ متعلقہ عہدیدار‘ علاقہ و زون کی تفصیلات اور سڑک تعمیر کرنے والے کنٹراکٹر کی تفصیلات کے علاوہ ان سے رابطہ کے نمبرات موجود ہوتے ہیں۔ اسی طرح اب جی ایچ ایم سی حدود میں محکمہ بلدی نظم ونسق کی جانب سے تجرباتی اساس پر QRکوڈ میں تفصیلات فراہم کرنے اقدامات کئے جائیں گے اور اگر یہ پائلٹ پراجکٹ کامیاب ہوتا ہے تو اس کو دیگر بلدیات میں توسیع دی جائے گی ۔ اس پراجکٹ پر حکام کا کہناہے کہ اس پراجکٹ پر عمل سے نہ صرف شہریوں کو سہولت ہوگی بلکہ عہدیداروں میں جوابدہی کا احساس پیدا ہونے کے علاوہ تعمیری کامو ںمیں شفافیت پیدا ہوگی۔ ذرائع کے مطابق محکمہ بلدی نظم و نسق سے QR کوڈ پر مشتمل تفصیلات کی تیاری کیلئے محکمہ انفارمیشن اینڈ ٹیکنالوجی کے ذریعہ کسی نئے اسٹارٹ اپ کو ساتھ لیتے ہوئے سرکاری سطح پر تفصیلات کا اندراج یقینی بنایا جائے گا۔م
