دوحہ۔13 مئی (یو این آئی) قطر کے وزیر اعظم محمد بن عبدالرحمان الثانی نے کہا ہے کہ اسرائیل اور فلسطینی تحریک حماس کے درمیان جنگ بندی معاہدہ پر متعدد خلاف ورزیوں کی وجہ سے پوری طرح سے عمل درآمد نہیں ہو سکا ہے ۔ قابل ذکر ہے کہ اسرائیل اور حماس کے درمیان تین مرحلوں پر مشتمل جنگ بندی کا معاہدہ فریقین نے جنوری 2025 میں امریکہ، مصر اور قطر کی ثالثی سے طے پایا تھا۔ تاہم مارچ میں جنگ بندی پر عمل درآمد نہیں کیا گیا۔ الثانی نے پیر کو واشنگٹن پوسٹ اخبار کو بتایا کہ ایک ثالث کے طور پر میں ہر ممکن کوشش کرتا ہوں کہ کسی بھی فریق پر تنقید نہ کروں، لیکن پہلے معاہدہ میں بہت سے مسائل اور خلاف ورزیاں تھیں جس سے ہم فریقین کے درمیان اعتماد پیدا کرنے کی اجازت نہیں دے سکے اور معاہدے کے دوسرے مرحلہ کو جاری رکھ سکیں۔ انہوں نے کہا کہ انہیں اس بارے میں کوئی اطلاع نہیں ہے کہ امریکی صدر ڈونلڈ ٹرمپ اپنے مغربی ایشیا کے دورے (جس میں دوحہ کا دورہ بھی شامل ہے ) کے دوران فلسطینیوں کے حق میں بات کریں گے یا نہیں۔ انہوں نے کہا کہ ہم نے ایسا کچھ نہیں سنا ہے لیکن یہ حتمی حل ہے ۔ قطر شروع سے ہی دو ریاستی حل پر پختہ یقین رکھتا ہے ۔ انہوں نے کہا کہ ٹرمپ کے ساتھ بات چیت کے دوران کئی پہلوؤں پر تبادلہ خیال کیا جائے گا۔
