نیویارک: ترجمان امریکی محکمہ خارجہ میتھیو ملر نے کہا ہے کہ بد قسمتی سے یہود دشمنی اور مسلم مخالف جذبات میں اضافہ ہو رہا ہے، اسرائیل فلسطین تنازعہ کا حل مسلمان، عیسائی اور یہودیوں کے مفاد میں ہے۔میتھیو ملر نے پریس بریفنگ کے دوران کہا ہے کہ بظاہر اسرائیل فلسطین تنازعہ کا دو ریاستی حل مشکل ہے، تاہم اسرائیل فلسطین تنازعہ کا دو ریاستی حل ہی آگے بڑھنے کا راستہ ہے۔ترجمان امریکی محکمہ خارجہ کا کہنا تھا کہ اس تنازعہ کا خاتمہ خطے کے دیگر ممالک کے مفاد میں بھی ہے۔میتھیو ملر نے کہا ہے کہ اسرائیل فلسطین تنازعہ سے متعلق دنیا بھر میں بڑھتی نفرتیں باعثِ تشویش ہیں، اس تنازعہ میں کسی فریق کو غیر انسانی سلوک روا رکھنے کا لائسنس حاصل نہیں۔انہوں نے مزید کہا کہ سب سے بھیانک چیز ہے کہ دونوں جانب سے غیر انسانی سلوک روا رکھا جا رہا ہے، غیر انسانی سلوک کی مخالفت کرتے ہیں، یہ کسی کے مفاد میں نہیں۔ترجمان امریکی محکمہ خارجہ میتھیو ملر نے یہ بھی کہا ہے کہ فلسطین کے ساتھ مصالحت اسرائیل کی سلامتی کے مفاد میں ہے، اسرائیل فلسطین تنازعہ کا پائیدار حل تلاش کرنے کی کوشش کر رہے ہیں۔
