جکارتہ، 30 ستمبر (یو این آئی) انڈونیشیا کے صوبہ مغربی جاوا میں ایک اسکول کی زیر تعمیر عمارت گرنے کے باعث ایک طالبعلم جاں بحق جبکہ 99 زخمی ہوگئے ۔ حکام نے بتایا ہے کہ انڈونیشیا کے مشرقی جاوا میں پیش آنے والے افسوسناک واقعے میں 65 طلبہ کے ملبے تلے دبے ہونے کا خدشہ ہے ، جنہیں نکالنے کیلئے امدادی کارروائیاں جاری ہیں۔ زخمی طلبہ کی عمریں 12سے 17 سال کے درمیان ہیں۔ ابتدائی اطلاعات کے مطابق، عمارت کی غیر قانونی توسیع اور ناقص تعمیر اس حادثے کی ممکنہ وجہ ہیں۔ یہ افسوسناک واقعہ اس وقت پیش آیا جب اسکول میں نماز اور کلاسز جاری تھیں۔ ریسکیو ٹیمیں، پولیس اور مقامی رضاکار ملبہ ہٹانے اور طلبہ کو بچانے کیلئے مصروف عمل ہیں۔ دوسری جانب متاثرہ طلبہ کے والدین سخت پریشانی کے عالم میں اسکول کے باہر جمع ہیں۔ اس سے قبل انڈونیشیا کے صوبہ مغربی جاوا میں اسکول سے کھانا خرید کر کھانے کے بعد ایک ہزار سے زائد بچے فوڈ پوائزننگ کا شکار ہوگئے تھے ، جس کے بعد ہیلتھ ایمرجنسی نافذ کردی گئی تھی۔ حکام کا کہنا تھا کہ واقعہ صدر پرابوو سبیانتو کے اربوں ڈالر کے “مفت غذائیت بخش کھانے “پروگرام کیلئے ایک بڑا جھٹکا ہے ۔ مغربی جاوا کے گورنر دیدی ملیادی نے بتایا کہ فوڈ پوائزننگ کے کیسز صوبہ کے چار علاقوں سے رپورٹ ہوئے ہیں، صرف ویسٹ باندونگ میں پیر کے روز 470 سے زائد طلبہ بیمار ہوئے ، جبکہ مزید تین مقامات پر مجموعی طور پر 580 بچوں پر اثرات مرتب ہوئے ۔ چھوٹے ہاسپٹل طلبہ کی بڑی تعداد کی وجہ سے شدید دباؤ کا شکار ہوگئے ، جس کے بعد صوبائی حکومت نے ہیلتھ ایمرجنسی نافذ کردی گئی۔
