لکھنو ۔ اترپردیش کے ضلع بجنور میں سڑک کے افتتاح کے لیے جیسے ہی ناریل پھوڑا گیاتو ناقص مال سے تعمیر شدہ سڑک ہی ٹوٹ گئی۔ میڈیا کے مطابق اتر پردیش میں بدعنوانی کے کیس لگاتار سامنے آرہے ہیں۔ بجنور میں سڑک کی تعمیر میں اس حد تک ناقص میٹریل استعمال کیا گیا تھا کہ افتتاح کے ناریل کی ضرب بھی برداشت نہ کر سکا۔ ہندوستانی میڈیا کے مطابق جس سڑک کے افتتاح کے لیے ناریل پھوڑا جانا تھا، وہ ایک ضرب بھی برداشت نہیں کرسکی۔ ضلع بجنور میں محکمہ آبپاشی کے ذریعہ نہر کی پٹری پر ایک کروڑ 16 لاکھ کی لاگت سے 7 کلو میٹر لمبی سڑک بنائی جانی تھی، تاہم سڑک صرف 700 میٹر ہی بن پائی تھی کہ محکمہ نے اس کے افتتاح کے لیے رکن اسمبلی سوچی موسم چودھری کو بلا لیا۔ واقعہ پر رکن اسمبلی سوچی موسم چودھری سخت شرمندہ ہوئیں افتتاح کا پروگرام ملتوی کر دیا گیا۔
