کابل: خطہ میں دہشت گرد سرگرمیوں میں ہندوستان کے ملوث ہونے کا ایک اور ثبوت منظرعام پر آگیا۔ افغانستان میں ہندوستانی دہشت گرد کو گرفتار کرلیا گیا۔ ہندوستانی دہشت گرد ثنا الاسلام کو 29 فروری کو افغانستان کے شہر قندھار سے گرفتار کیا گیا۔ ہندوستانی دہشت گرد کا تعلق کیرالہ سے ہے اور وہ تاجکستان کے راستے افغانستان میں داخل ہوا۔ ثنا الاسلام نے ہندوستانی افسران کے حکم پر افغانستان آنے کا اعتراف کرتے ہوئے کہا کہ ہندوستانی افسروں نے افغانستان میں داعش کے نمائندوں سے ملاقات کا حکم دیا تھا۔ افغانستان کی انٹیلی جنس ایجنسی نے ثنا الاسلام کو داعش سے رابطے کے جرم میں گرفتار کیا ہے اور اس نے داعش سے روابط کا اعتراف بھی کرلیا ہے۔ سال 2016 میں بھی ایک بھارتی خاتون داعش کیلئے کام کرنے پر گرفتار کی گئی تھیں۔ نومبر2019 میں داعش کیلئے کام کرنے والی 10 ہندوستانی خواتین ننگرہار سے گرفتارہوئی تھیں۔
