رہائی پانے والے قیدیوں کو قندھار میں ریڈ کراس کی بین الاقوامی کمیٹی کے حوالے کیا جائے گا
کابل 12 اپریل ( سیاست ڈاٹ کام ) افغانستان حکومت کی جانب سے 100 قیدی رہا کیے جانے کے بعد افغان طالبان نے بھی کابل انتظامیہ کے 20 قیدی رہا کرنے کا اعلان کیا ہے۔ طالبان ترجمان سہیل شاہین نے ٹویٹر پر بتایاکہ آج امارت اسلامیہ افغانستان، کابل انتظامیہ کے 20 قیدیوں کو رہا کریگی اور انہیں قندھار میں بین الاقوامی ریڈ کراس کمیٹی کے حوالے کیا جائے گا۔پیش رفت ایک ایسے وقت میں ہوئی ہے جب 8 اپریل کو کابل حکومت کی جانب سے افغان طالبان کے 100 قیدیوں کو رہا کیا گیا تھا۔ 29فروری کو قطر میں امریکہ ۔ طالبان کے مابین ایک معاہدہ ہوا تھا، جس کے بعد یہ امید کی جا رہی ہے کہ اس سے افغانستان میں امن کی راہیں کھلیں گی۔اس معاہدے میں یہ طے پایا تھا کہ نہ صرف امریکہ مئی 2021 تک اپنی فوجوں کا انخلا کرے گا بلکہ افغان فریقین کے مابین مذاکرات سے پہلے ہزاروں قیدیوں کا تبادلہ بھی کیا جائیگا۔اس مقصد کیلئے طالبان کا تین رکنی وفد 31 مارچ کو کابل گیا تھا تاکہ وہاں قیدیوں کی پہچان اور ان کی رہائی کیلئے حکومت سے بات کر سکے۔تاہم بعد ازاں 7 اپریل کو طالبان نے قیدیوں کی رہائی کے حوالے سے افغانستان حکومت کو ‘غیر سنجیدہ’ قرار دے کر اپنے وفد کو واپس بلانے کا اعلان کیا تھا،۔دوسری جانب افغان حکومت نے موقف اپنایا تھا کہ قیدیوں کی رہائی میں طالبان جلد بازی کر رہے ہیں اور 10 دنوں میں قیدی رہا کروانا چاہتے ہیں۔لیکن طالبان وفد واپس بلانے کے ایک دن بعد افغانستان حکومت نے 100 طالبان قیدیوں کو رہا کر دیا تھا۔
