ابوظہبی : متحدہ عرب امارات کے وزیر خارجہ شیخ عبداللہ بن زاید آل نہیان نے منگل کو ابو ظبی میں اسرائیلی ہم منصب جدعون ساعر کا خیرمقدم کیا ہے۔ خبررساں ادارہ وام کے مطابق ملاقات میں خطے کی حالیہ صورتحال خاص طور پر غزہ میں بڑھتے ہوئے انسانی بحران پر تبادلہ خیال کیا گیا۔غزہ میں پائیدار جنگ بندی کے حوالے سے کی جانے والی علاقائی اور بین الاقوامی کوششوں کا بھی جائزہ لیا گیا۔اماراتی وزیر خارجہ نے مستقل جنگ بندی تک پہنچنے اور خطے میں تنازعات کو پھیلنے سے روکنے کے لیے مشترکہ کوششوں کی اہمیت پر زور دیا۔انہوں نے کہاکہ کشیدگی اور تشدد کا خاتمہ، شہریوں کی زندگیوں کا تحفظ اور فوری انسانی امداد کی فراہمی کو آسان بنانے کی ہر ممکن کوشش کرنا ترجیح ہے۔‘ان کا کہنا تھا’ مشرق وسطی بڑھتی ہوئی کشیدگی اورعدم استحکام کا سامنا کررہا ہے۔ انتہا پسندی، کشیدگی اور بڑھتے ہوئے تشدد کے خاتمے کے لیے بین الاقوامی کوششوں کی ضرورت ہے۔‘اماراتی وزیر خارجہ نے قیدیوں کے تبادلے کے معاہدہ کیلئے قطر، مصر اور امریکہ کی ثالثی کی کوششوں کے لیے امارات کی سپورٹ کا اعادہ کیا۔انہوں نے فلسطینی عوام اور ان کے حق خودارادیت کی سپورٹ کے لیے امارات کے دیرینہ موقف کو بھی دہرایا۔
