واشنگٹن : امریکہ کے شہر سان فرانسسکو میں اوبر کار سروس کے ڈرائیور کے ساتھ بدتمیزی کرنے والی خاتون کی ضمانت ہو گئی ہے۔ گذشتہ ہفتہ کے روز پیش آئے واقعہ کی ویڈیو سوشل میڈیا پر وائرل ہو گئی تھی۔تفصیلات کے مطابق 24 سالہ خاتون ارنا کیمیائے پر چوری، دھاوے، مار پیٹ، سازش اور صحت و سلامتی سے متعلق قانون کی خلاف ورزی کے الزامات عائد کیے گئے۔ اوبر سروس کے نیپالی ڈرائیور سوبھاکار کاڈکا نے سفر شروع کرنے سے قبل مذکورہ خاتون کو چہرے پر ماسک لگانے کے لیے کہا۔ خاتون نے بات ماننے کے بجائے ڈرائیور کو برا بھلا کہنا شروع کر دیا۔ خاتون نے ڈرائیور سے کہا کہ وہ خوش قسمت ہے کہ اس بات پر ڈرائیور کی پٹائی نہیں کی۔ سوبھاکار 8 برس قبل اپنے گھرانے کی مالی مدد کے واسطے نیپال سے امریکہ آیا تھا۔واقعہ پیش آنے کے وقت ارنا گاڑی میں تنہا نہیں تھی بلکہ ساتھ اس کی دو سہیلیاں بھی سوار تھیں۔ چند گھنٹوں بعد گاڑی میں سوار ایک خاتون کنگ ملائیشیا کو لاس ویگاس میں حراست میں لے لیا گیا۔ اس پر واقعہ کی مرکزی خاتون ارنا نے خود کو پولیس کے حوالے کر دیا۔برطانوی اخبار ڈیلی میل کے مطابق استغاثہ کے نمائندوں نے بتایا کہ آخر کار ارنا کے خلاف چوری اور سازش کرنے کے الزامات ساقط ہو گئے۔ مقامی میڈیا نے بتایا کہ ارنا کو ضمانت پر رہا کر دیا گیا ہے۔ اب وہ اپنے خلاف آئندہ عدالتی کارروائی کی تاریخ کی منتظر ہے۔
