واشنگٹن : 18جون ( ایجنسیز) امریکہ نے اپنے شہریوں کو سخت انتباہ جاری کیا ہے کہ وہ اسرائیل، عراق یا ایران کا سفر نہ کریں کیونکہ ایران پر غیر معمولی اسرائیلی حملوں اور تہران کے جوابی حملوں کے بعد اسرائیل اور ایران کے درمیان تنازعہ شدت اختیار کر گیا ہے۔امریکی محکمہ خارجہ کی ترجمان ٹیمی بروس کا کہنا تھا کہ ‘ہم امریکی شہریوں کو یاد دلاتے ہیں کہ وہ اسرائیل یا عراق اورکسی بھی صورت میں ایران کا سفر نہ کریں’۔یہ اعلان ایسے وقت میں سامنے آیا ہے جب ایران کے خلاف اسرائیلی حملے چھٹے روز میں داخل ہو گئے ہیں اور دونوں فریقوں کے درمیان حملوں کا تبادلہ ہو رہا ہے جو اب تک کا سب سے شدید براہ راست تصادم بن چکا ہے۔انہوں نے کہا کہ امریکہ نے خطے بھر میں شہریوں اور سفارتی عملے کی مدد کے لیے 24 گھنٹے مڈل ایسٹ ٹاسک فورس قائم کی ہے۔انہوں نے کہا کہ ٹاسک فورس نے متعدد ممالک کے لئے 30 سے زیادہ سیکیورٹی الرٹس اور تازہ ترین ٹریول ایڈوائزری جاری کی ہیں۔انہوں نے کہا کہ محکمہ خارجہ نے مشرق وسطیٰ ٹاسک فورس قائم کی ہے جس کا مقصد امریکی شہریوں، ہمارے امریکی سفارتی مشنز اور اہلکاروں اور سفارتی مصروفیات کی حمایت کو مربوط بنانا ہے۔امریکہ، جس کا ایران میں کوئی سفارت خانہ نہیں ہے، پہلے ہی عراق میں اپنے سفارت خانے میں عملے کی تعداد میں کمی کر چکا ہے اور عراق اور اسرائیل دونوں سے غیر ضروری اہلکاروں اور ان کے اہل خانہ کے انخلا کی اجازت دے چکا ہے۔اسرائیل نے جمعہ کے روز ایران پر بڑے پیمانے پر فضائی حملے کیے جن میں 220 سے زائد افراد ہلاک اور 1400 سے زائد زخمی ہوئے۔
