دبئی۔17 جولائی (سیاست ڈاٹ کام ) ورلڈ کپ فائنل میں مقابلہ ٹائی ہونے کے باوجود انگلینڈ کو باؤنڈریز کی بنیاد پر چمپین قرار دینے کے قانون پر انٹرنیشنل کرکٹ کونسل(آئی سی سی) کو شدید تنقید کا سامنا ہے لیکن عظیم بالی ووڈ فنکار امیتابھ بچن نے تنقید میں سب کو پیچھے چھوڑ دیا۔ انگلینڈ اور نیوزی لینڈ کے درمیان اتوارکو لارڈز کے تاریخی میدان پر کھیلے گئے ورلڈکپ فائنل میچ میں مقابلہ 50اوورز میں ٹائی رہا اور پھر سوپر اوور میں بھی مقابلہ ٹائی رہا جس کے بعد میچ میں زیادہ باؤنڈریز کی بنیاد پر انگلینڈ کو فاتح اور ورلڈ چمپیئن قرار دیا گیا۔ فائنل میچ کے بعد سابق کرکٹرز سمیت مختلف حلقوں سے آئی سی سی کے اس متنازعہ قانون اور انگلینڈ کو میچ ٹائی ہونے کے باوجود چمپیئن قرار دینے پر شدید تنقید کا نشانہ بنایا جا رہا ہے۔ بالی ووڈ کے عظیم فنکار امیتابھ بچن نے سب کو پیچھے چھوڑتے ہوئے آئی سی سی کو آئینہ دکھا دیا۔ہندی میں کی گئی ٹوئٹ میں امیتابھ بچن نے اس قانون کو تنقید کا نشانہ بناتے ہوئے کہا کہ آپ کے پاس 2 ہزار روپے اور میرے پاس بھی 2 ہزار روپے ہیں، آپ کے پاس 2 ہزار روپے کا ایک نوٹ ہے اور میرے پاس500 روپے کے 4 نوٹ ہیں توکون زیادہ امیر ہوا؟ آئی سی سی کا ماننا ہے کہ وہ زیادہ امیر ہے کہ جس کے پاس 500 روپے کے چار نوٹ ہیں۔
