حیدرآباد ۔ 21۔نومبر (سیاست نیوز) اسپیکر قانون ساز اسمبلی جی پرساد کمار کی جانب سے انحراف کے الزامات کا سامنا کرنے والے ارکان اسمبلی کی سماعت کے دوران دو ارکان اسمبلی پیش ہوتے ہوئے بی آر ایس سے انحراف کی تردید کی ۔ پوچارام سرینواس ریڈی اور اے گاندھی کو گورنر نے تحقیقات کیلئے نوٹس جاری کرتے ہوئے طلب کیا تھا۔ بی آر ایس کے جگدیش ریڈی اور سنجے نے دونوں کے خلاف انسداد انحراف قانون کے تحت شکایت کرتے ہوئے اسمبلی کی رکنیت سے نااہل قرار دینے کی اپیل کی تھی۔ اسپیکر کے روبرو فریقین نے اپنے اپنے دلائل پیش کئے اور شکایت کنندہ ارکان کے وکلاء نے جرح کی۔ واضح رہے کہ شیر لنگم پلی کے رکن اسمبلی اے گاندھی اور بانسواڑہ کے رکن اسمبلی پوچارام سرینواس ریڈی کے معاملہ میں آخری مرحلہ میں سماعت ہوئی۔ اسپیکر نے 8 ارکان اسمبلی کے خلاف درخواستوں کی سماعت کو مکمل کرلیا ہے ۔ انہوں نے باقی دو ارکان ڈی ناگیندر اور کڈیم سری ہری کو دوبارہ نوٹس جاری کرتے ہوئے فوری جواب داخل کرنے کی ہدایت دی ہے ۔ ذرائع کے مطابق پوچارام سرینواس ریڈی اور اے گاندھی نے کانگریس میں انحراف کی تردید کی اور کہا کہ انہوں نے اپنے حلقہ جات کی ترقی کے سلسلہ میں ریونت ریڈی سے ملاقات کی تھی۔ ان کا کہنا ہے کہ پارٹی کا کھنڈوا پہن لینے سے انحراف ثابت نہیں ہوتا۔ اسپیکر پرساد کمار کو اندرون ایک ہفتہ تحقیقات مکمل کرتے ہوئے سپریم کورٹ کو رپورٹ پیش کرنی ہے ۔1
