انڈین ویلس ۔ 12 مارچ (سیاست ڈاٹ کام) عالمی نمبر ایک جاپان کی ٹینس اسٹار نومی اوساکا نے شاندار کارکردگی کا سلسلہ جاری رکھتے ہوئے انڈین ویلس ماسٹرس کے پری کوارٹر فائنل میں رسائی حاصل کرلی ہے جبکہ سینئر کھلاڑی وینس ولیمس نے بھی 32 کھلاڑیوں کے مرحلے کے مقابلے میں کامیابی حاصل کرلی ہے۔ اوساکا نے مقامی امریکی کھلاڑی کولنس سے خلاف راست سیٹوں میں 6-4، 6-2 کی کامیابی حاصل کی۔ جبکہ وینس ولیمس نے ہم وطن مائیک ہالے کے خلاف 6-2، 7-5 کی کامیابی حاصل کی۔ دریں اثناء عالمی درجہ بندی میں 15 ویں مقام پر فائز جولیا گارجیس کو ہم وطن کھلاڑی بارتھیل کے خلاف 3 سیٹوں کے مسابقت مقابلے میں 5-7، 6-1، 4-6 کی ناکامی برداشت کرنی پڑی۔ عالمی درجہ بندی میں پانچویں مقام پر فائز چیک جمہوریہ کی پلیس کووا نے جرمنی کی بونا وینچر کو راست سیٹوں میں 6-3، 6-2 سے شکست دی۔ مرد زمرہ کے مقابلے میں ڈومینک تھم نے جائیلس سیمون کے خلاف 6-3، 6-1 کی کامیابی حاصل کی جبکہ فرانس کے ٹینس اسٹار جائیلس موفلس کو اپنے یونانی حریف راموس وینولاس کو شکست دینے کیلئے زیادہ محنت نہیں کرنی پڑی اور انہوں نے 6-0، 6-3 کی کامیابی حاصل کی تاہم عالمی درجہ بندی میں تیسرے مقام پر فائز خطاب کے دعویدار الیگزینڈر زوریوف کو ہم وطن جرمنی کے اسٹرف کیخلاف 6-3، 6-1 کی ناکامی برداشت کرنی پڑی۔
